মহানগৰীৰ ছয়মাইল অঞ্চলত এটা চাঞ্চল্যকৰ ঘটনাই ঠাই পাইছে। প্ৰেমৰ প্ৰতিশোধৰ নামত সংঘটিত হৈছে এক ভয়ংকৰ কাণ্ড। প্ৰিন্স ৰেচিডেন্সী নামৰ এপাৰ্টমেণ্টত মাজনিশা এগৰাকী যুৱতীৰ কোঠাত সোমাই তৰোৱালেৰে সন্ত্ৰাস সৃষ্টি কৰে দেৱজিৎ কুটুম নামৰ এজন ব্যক্তিয়ে।

USTM মেঘালয়ৰ উপাচাৰ্য মহবুবুল হকক দ্বিতীয় গোচৰত জামিন প্ৰদানৰ আগতেই ষষ্ঠ গোচৰত পুনৰ গ্ৰেপ্তাৰ কৰা হৈছে। ঢেকীয়াজুলি আৰক্ষীয়ে শ্ৰীভূমি জিলা কাৰাগাৰত বন্দী হৈ থকা হকক কাৰাগাৰৰ ভিতৰতে গ্ৰেপ্তাৰ কৰি শ্ৰীভূমিৰ পৰা ঢেকীয়াজুলিলৈ নিয়ে। উচ্চ ন্যায়ালয়ে প্ৰথম গোচৰত জামিন দি দ্বিতীয় গোচৰত জামিনৰ ৰায় সংৰক্ষণ কৰি তৃতীয়, চতুৰ্থ আৰু পঞ্চম গোচৰত গ্ৰেপ্তাৰত স্থগিতাদেশ দিছিল যদিও ঢেকীয়াজুলি আৰক্ষীয়ে আজি ষষ্ঠ গোচৰত পুনৰ গ্ৰেপ্তাৰ কৰে।

দেশৰ দুটা সৰ্বভাৰতীয় দলৰ অসম ৰাজ্যিক সমিতিৰ সভাপতিসকলে শীঘ্ৰে কংগ্ৰেছত যোগদান কৰিব বুলি জনাজাত হৈছে। তৃণমূল কংগ্ৰেছ আৰু আম আদমী পাৰ্টীৰ অসম ৰাজ্যিক সমিতিৰ সভাপতিসকলে কংগ্ৰেছত যোগদান কৰিব বুলি কংগ্ৰেছৰ এক সূত্ৰই দাবী কৰিছে। আম আদমী পাৰ্টীৰ ৰাজ্যিক সভাপতি মনোজ ধনোৱা আৰু তৃণমূল কংগ্ৰেছৰ ৰাজ্যিক সভাপতি ৰমেন বৰঠাকুৰে কংগ্ৰেছত যোগদান কৰিব বুলি সূত্ৰটোৱে দাবী কৰে।

অসম বিধানসভাত আজি এক উত্তাল পৰিৱেশৰ সৃষ্টি হৈছে। ১৪৭ গৰাকী অংশকালীন প্ৰৱক্তাৰ চাকৰি উভতাই দিয়াৰ দাবীত বিৰোধী দলৰ সদস্যসকলে সদন অচল কৰি তুলিছে। এই প্ৰৱক্তাসকলে চাকৰি হেৰুৱাৰ পিছত প্ৰতিবাদ কৰি আহিছে। আজি বিধানসভাৰ কাৰ্যপ্ৰণালী আৰম্ভ হোৱাৰ লগে লগে বিৰোধী দলৰ সদস্যসকলে এই প্ৰৱক্তাসকলক পুনৰ চাকৰি দিয়াৰ দাবী উত্থাপন কৰে।

আন্তৰ্জাতিক চলচ্চিত্ৰ মহোৎসৱত অসমীয়া গীতৰ উজ্জ্বল প্ৰদৰ্শন। কলিকতাৰ স্বামী বিবেকানন্দ হলত অনুষ্ঠিত ৫ম আন্তৰ্জাতিক ষ্টাৰ চলচ্চিত্ৰ মহোৎসৱত অসমীয়া গীত “ৰুণ ঝুন ঝুন”ই শ্ৰেষ্ঠ সংগীত ভিডিঅ’ৰ বঁটা লাভ কৰিছে। এই গীতটোৰ কথা, সুৰ, সংগীত আৰু সংগীত পৰিচালনা ড° অপৰ্ণা বুজৰবৰুৱাৰ। তেওঁক এই মহোৎসৱতে শ্ৰেষ্ঠ সংগীত পৰিচালকৰ বাবে প্ৰতিষ্ঠিত ‘সলিল চৌধুৰী বঁটা’ৰে সন্মানিত কৰা হৈছে।

গীতটোত কণ্ঠ দিছে ড° সঙ্গীতা কাকতীয়ে আৰু নৃত্যৰ মাধ্যমেৰে জিলিকিছে মেঘৰঞ্জনী মেধীয়ে। গীতৰ ভিডিঅ’টোৰ পৰিচালনা অন্তৰীপ হাজৰিকাৰ। ইতিমধ্যে এই গীতৰ ভিডিঅ’টোৱে চাৰিটা বঁটা লাভ কৰিছে।

গুৱাহাটী মহানগৰীৰ বেলতলা অঞ্চলত এগৰাকী চিকিৎসকে দৰিদ্ৰ দোকানী এটা পৰিয়ালক আক্ৰমণ কৰাৰ ঘটনাই তীব্ৰ চাঞ্চল্যৰ সৃষ্টি কৰিছে। ডা০ বি কলিতা নামৰ চিকিৎসকজনে তেওঁৰ ক্লিনিকৰ সন্মুখত দোকান চলোৱা দম্পতীজনক টকা দাবী কৰি আহিছিল। ৰমজান মাহত বিক্ৰী কমি যোৱাত টকা পৰিশোধ কৰিব নোৱাৰাত তেওঁলোকৰ মাজত বিবাদৰ সৃষ্টি হয়।

বিবাদৰ জৰিয়তে চিকিৎসক আৰু তেওঁৰ কৰ্মচাৰীয়ে দোকানী আৰু তেওঁৰ পত্নীক শাৰীৰিকভাৱে আক্ৰমণ কৰে। মহিলাগৰাকীয়ে কয়, “তেওঁ মোৰ স্বামীক আঘাত কৰিছিল আৰু মোকো আক্ৰমণ কৰিছিল। মোৰ হাত আৰু বুকুত আঘাত লাগিছে।” আক্ৰমণৰ দৃশ্য মোবাইল কেমেৰাত ধৰা পৰিছে।

গুৱাহাটীৰ নুনমাটী উচ্চ বিদ্যালয়ৰ দুই ছাত্ৰ বিকাশ ৰাজবংশী আৰু আলী হুছেইন নিৰুদ্দেশ হোৱাৰ ঘটনাই তীব্ৰ চাঞ্চল্যৰ সৃষ্টি কৰিছিল। ছয় দিনৰ অনুসন্ধানৰ পিছত গুৱাহাটী আৰক্ষীয়ে দুয়োকে পশ্চিমবংগৰ হাওৰাত থকাৰ সম্ভেদ পাইছে। নুনমাটী আৰক্ষীৰ এটা দলে আজি পুৱাই তেওঁলোকক উদ্ধাৰ কৰিবলৈ হাওৰালৈ ৰাওনা হৈছে।

দুই ছাত্ৰই ৭ মাৰ্চত পৰীক্ষা দিবলৈ ঘৰৰ পৰা ওলাই আহি উভতি নাহে। পৰিয়ালৰ সন্দেহ মতে, তেওঁলোক হায়দৰাবাদলৈ যাব পাৰে, কিয়নো বিকাশে যোৱা কেইদিনমান ধৰি মাকক হায়দৰাবাদৰ দূৰত্বৰ বিষয়ে সুধি আছিল। তেওঁ ঘৰৰ পৰা কাপোৰ আৰু গুৰুত্বপূৰ্ণ নথিপত্ৰ লৈ গৈছিল। আলী হুছেইনেও ১০ হাজাৰ টকা আৰু নথিপত্ৰ লৈ ওলাইছিল।

পাহাৰীয়া জিলা কাৰ্বি আংলঙৰ ১৮ হাজাৰ বিঘা ভূমি পুঁজিপতি গোষ্ঠীৰ হাতলৈ যোৱাৰ আশংকাত স্থানীয় খিলঞ্জীয়া লোকসকলৰ মাজত উদ্বেগৰ ছাঁ পৰিছে। অসম চৰকাৰে এই ভূমি অধিগ্ৰহণ কৰি ১,০০০ মেগাৱাটৰ সৌৰ শক্তি প্ৰকল্প স্থাপনৰ পৰিকল্পনা কৰিছে। এই প্ৰকল্পৰ বাবে কাৰ্বি আংলঙৰ খটখটি-লংকাথাৰ অঞ্চলৰ ২৩ খন গাঁৱৰ প্ৰায় ২০ হাজাৰ কাৰ্বি, নাগা আৰু আদিবাসী লোক উচ্ছেদ হ’বলৈ বাধ্য হ’ব। এই ভূমিত দুশ বছৰ ধৰি থলগিৰীয়াসকলে বসবাস কৰি আহিছে আৰু খেতি-বাতিৰ জৰিয়তে জীৱন-জীৱিকা নিৰ্বাহ কৰি আহিছে।

অসমৰ পলিটেকনিকৰ ৬৪ গৰাকী প্ৰৱক্তাক চাকৰিৰ পৰা অব্যাহতি দিয়া হৈছে। এই প্ৰৱক্তাসকলে ২৩ দিন ধৰি অনশন কৰি চাকৰি নিয়মীয়াকৰণৰ দাবী তুলি আছিল। হিমন্ত বিশ্ব শৰ্মা শিক্ষামন্ত্ৰী হৈ থকাৰ সময়তে তেওঁলোকক নিযুক্তি দিয়া হৈছিল।

২০২৫-২৬ বৰ্ষৰ বাজেট উত্তাপন কৰাৰ পিছতে অসম কংগ্ৰেছে বাজেটখনক পৰনিৰ্ভৰশীল বুলি আখ্যা দি তীব্ৰ সমালোচনা কৰিছে। বিত্তমন্ত্ৰী অজন্তা নেওগে আজি বিধানসভাত ৩৬ হাজাৰ ১৮৫ কোটী টকাৰ বাজেট প্ৰস্তাৱ আগবঢ়োৱাৰ পিছতে কংগ্ৰেছে ইয়াক প্ৰতিশ্ৰুতিৰে ভৰা কিন্তু বাস্তৱতঃ পৰনিৰ্ভৰশীল বুলি অভিহিত কৰিছে। কংগ্ৰেছ নেতা ৰিপুন বৰাই কয় যে এই বাজেটখন কেৱল অলংকাৰেৰে ভৰা আৰু ইয়াৰ লগত ৰাইজৰ প্ৰকৃত সমস্যাৰ কোনো সম্পৰ্ক নাই।