সোণাপুৰত বায়ুসেনাক ভূমি হস্তান্তৰৰ বিৰোধিতাত উত্তেজনা

protest against airforce at digaru

সোণাপুৰত বায়ুসেনাক ভূমি হস্তান্তৰৰ বিৰোধিতাত উত্তেজনা

গুৱাহাটীৰ সমীপৱৰ্তী সোণাপুৰত আজি হাজাৰ হাজাৰ জনজাতীয় লোকে বায়ুসেনাক ভূমি হস্তান্তৰৰ প্ৰস্তাৱৰ বিৰুদ্ধে প্ৰতিবাদত উত্তাল হয়। সোণাপুৰ মিনি ষ্টেডিয়ামত অনুষ্ঠিত এই প্ৰতিবাদত “তেজ দিম, মাটি নিদিওঁ” আৰু “ডিগাৰু এয়াৰ ফ’ৰ্চ মুৰ্দাবাদ” শ্লোগানেৰে জনজাতীয় লোকে নিজৰ ভূমিৰ ওপৰত হস্তক্ষেপৰ অভিযোগ তুলিছে।

বিবাদৰ মূল কাৰণ হৈছে ৰাজ্য চৰকাৰৰ ডিগাৰুৰ বিশাল ভূমি বায়ুসেনাক দিয়াৰ পৰিকল্পনা। ইয়াৰ ফলত জনজাতীয় লোকৰ মাটি আৰু জীৱিকাৰ অধিকাৰ খৰ্ব হোৱাৰ অভিযোগ উঠিছে। বায়ুসেনাই ডিগাৰু ঘাঁটিৰ ৯০০ মিটাৰৰ ভিতৰত নিৰ্মাণকাৰ্য বন্ধৰ নিৰ্দেশ জাৰি কৰাত উত্তেজনা বৃদ্ধি পাইছে।

প্ৰতিবাদকাৰীয়ে সোণাপুৰৰ সকলো দোকান-বজাৰ বন্ধ কৰি বেনাৰ-পোষ্টাৰেৰে বায়ুসেনাৰ বিৰুদ্ধে শ্লোগান দিছে। তেওঁলোকে অভিযোগ কৰিছে যে অসমত ডিমা হাচাওত ৯,০০০ বিঘা, কাৰ্বি আংলংত ১৮,০০০ বিঘা আৰু পলাশবাৰীত ১,০০০ বিঘা ভূমি জনজাতীয় লোকৰ পৰা লৈ পুঁজিপতি আৰু চৰকাৰী প্ৰকল্পৰ হাতত গতাই দিয়া হৈছে।

স্থানীয় লোকে কয় যে বায়ুসেনাই ৬০-৭০ বছৰ ধৰি বসবাস কৰা লোকক ভীতিগ্ৰস্ত কৰি নিৰ্মাণকাৰ্য বন্ধ কৰিছে। ডিমৰীয়া সম-জিলা আয়ুক্তকো  বায়ুসেনাই উচ্ছেদৰ বাবে  হেঁচা দিয়াৰ অভিযোগ উঠিছে। প্ৰতিবাদকাৰীয়ে বায়ুসেনা ঘাঁটি স্থানান্তৰ আৰু ভূমিৰ অধিকাৰ ঘূৰাই দিয়াৰ দাবী জনাইছে।

আজিৰ সভাত হেমন্ত কলিতাৰ নেতৃত্বত ৪০ সদস্যৰ সমিতি গঠন কৰি গুৱাহাটী উচ্চ ন্যায়ালয়ত যোৱাৰ সিদ্ধান্ত লয়। ৩ এপ্ৰিলত বিষয়া অজয় ৰাণাৰ প্ৰতিমূৰ্তি দাহ আৰু ১৫ দিনৰ ভিতৰত বায়ুসেনাৰ লোকক ভাড়াঘৰ খালী কৰাৰ নিৰ্দেশ দিয়া হয়। বজাৰত শাক-পাচলি, মাছ-মাংস বিক্ৰীৰ পৰাও বিৰত থকাৰ সিদ্ধান্ত লোৱা হয়।

১০ দিনৰ ভিতৰত নিৰ্মাণকাৰ্য বন্ধৰ নিৰ্দেশ বাতিল আৰু বেৰিকেড আঁতৰোৱাৰ দাবীৰ নিষ্পত্তি নহ’লে পৰিস্থিতি উত্তপ্ত হ’ব বুলি সতৰ্ক কৰা হৈছে।

অসম ছাত্ৰ সন্থা, জনজাতি মহাসংঘ আৰু অন্যান্য সংগঠনে এই আন্দোলনলৈ সমৰ্থন জনাইছে। ১৮৮৬ৰ অসম ভূমি আইন আৰু জনজাতীয় বেল্টৰ সুৰক্ষা উলংঘাৰও অভিযোগ উত্থাপিত হৈছে।

“আমি উন্নয়নৰ বিৰোধী নহয়, কিন্তু জনজাতীয় লোকৰ উপকাৰী প্ৰকল্প কিয় নাহে?”—ডিমৰীয়া নাগৰিক সুৰক্ষা সমিতিৰ সভাপতি ৰত্নেশ্বৰ ৰংহাঙে প্ৰশ্ন তুলিছে।  

Guwahati Dotcom
Guwahati Dotcom is a comprehensive online platform dedicated to the city of Guwahati. It serves as a hub for local businesses, tourists, and residents. 

Email: sales@guwahati.com

Social Media