জ্যেষ্ঠ সাংবাদিক দিলোৱাৰ হুছেইন মজুমদাৰক দ্বিতীয়টো গোচৰত জামিন প্ৰদান কৰিছে কামৰূপ মহানগৰ জিলা মুখ্য ন্যায়াধীশৰ আদালতে। ২৭ মাৰ্চৰ পৰা জেৰা আৰু তালাচীৰ পিছত শুক্ৰবাৰে আদালতত হাজিৰ কৰোৱাৰ পিছত ২০ হাজাৰ টকাৰ বণ্ডত তেওঁক জামিন মঞ্জুৰ কৰা হয়। তেওঁৰ অধিবক্তা অংশুমান বৰাই যুক্তি দাঙি ধৰাৰ পিছত আদালতে এই সিদ্ধান্ত লয়।
আৰক্ষীয়ে দিলোৱাৰৰ ঘৰ আৰু ব্যৱসায়িক প্ৰতিষ্ঠানত তালাচী চলাই দুখন ডাম্পাৰ জব্দ কৰিছে। এপেক্স বেংকৰ পৰিচালন সঞ্চালকৰ গোচৰত অতিৰিক্ত ধাৰা সংযোগৰ আৰ্জি আৰক্ষীৰ পক্ষৰ অধিবক্তাই দাখিল কৰিলেও আদালতে তাক গ্ৰহণ নকৰিলে। নথি জমাৰ সময় অতিক্ৰম হোৱাৰ বাবে দিলোৱাৰে আজি ন্যায়িক জিম্মাত কেন্দ্ৰীয় কাৰাগাৰত থাকিব লাগিব। যদি গুৱাহাটী আৰক্ষী তৃতীয়বাৰ গ্ৰেপ্তাৰ নকৰে, তেন্তে শনিবাৰে তেওঁ মুকলি হ’ব পাৰে।
চৰকাৰৰ দমনমূলক নীতিৰ সমালোচনা কৰি বহুতে কৈছে যে দুৰ্নীতিৰ বিৰুদ্ধে সংবাদ পৰিৱেশন কৰা সাংবাদিকক লক্ষ্য কৰি গোচৰ ৰুজু কৰি গ্ৰেপ্তাৰ কৰা হৈছে। ২৫ মাৰ্চত এপেক্স বেংকৰ ২৮ কোটি টকাৰ কেলেংকাৰীৰ প্ৰতিবাদৰ বাতৰি সংগ্ৰহৰ সময়ত দিলোৱাৰক গ্ৰেপ্তাৰ কৰা হৈছিল।
