মেঘালয়ৰ শ্বিলং প্ৰেছ ক্লাবে (এছপিচি) অসমৰ জ্যেষ্ঠ সাংবাদিক দিলোৱাৰ হুছেইন মজুমদাৰৰ গ্ৰেপ্তাৰৰ তীব্ৰ নিন্দা জনাই এক বিবৃতি জাৰি কৰিছে। ক্ৰছকাৰেণ্ট ডিজিটেল মিডিয়াৰ মুখ্য মজুমদাৰক প্ৰথমে ২৫ মাৰ্চৰ নিশা গ্ৰেপ্তাৰ কৰা হৈছিল। ২৬ মাৰ্চত তেওঁক জামিন মঞ্জুৰ কৰাৰ পিছতো ২৭ মাৰ্চত অসম এপেক্স বেংকৰ পৰিচালন সঞ্চালকৰ এজাহাৰৰ ভিত্তিত পুনৰ গ্ৰেপ্তাৰ কৰা হয়।
শ্বিলং প্ৰেছ ক্লাবৰ সভাপতি ডি এল চিয়াংছাইয়ে কয় যে জামিনৰ পিছতো পুনৰ গ্ৰেপ্তাৰৰ ঘটনা গভীৰ উদ্বেগজনক আৰু আইনী প্ৰক্ৰিয়াৰ অপব্যৱহাৰৰ এক উদাহৰণ। তেওঁৰ মতে, এই কাৰ্যক্ৰমে সংবাদ মাধ্যমৰ স্বাধীনতা তথা মুক্ত মত প্ৰকাশৰ মৌলিক অধিকাৰৰ ওপৰত প্ৰত্যক্ষ আঘাত হানিছে। তেওঁ লগতে কয় যে এই গ্ৰেপ্তাৰ ক্ষমতাসীন ৰাজনৈতিক দলৰ বিৰুদ্ধে অনুসন্ধানমূলক সাংবাদিকতাৰ সৈতে জড়িতসকলক ভয় খুৱাই নীৰৱ কৰাৰ এক প্ৰয়াস।
চিয়াংছাইৰ মতে, গণতান্ত্ৰিক সমাজত সংবাদ মাধ্যমে স্বচ্ছতা, দায়বদ্ধতা আৰু তথ্যৰ মুক্ত প্ৰবাহ নিশ্চিত কৰে। এই ভূমিকাক বলপূৰ্বক দমনৰ চেষ্টা গ্ৰহণযোগ্য নহয় আৰু ইয়াৰ বিৰুদ্ধে দৃঢ় প্ৰতিৰোধৰ প্ৰয়োজন। শ্বিলং প্ৰেছ ক্লাবে মজুমদাৰৰ সৈতে সংহতি প্ৰকাশ কৰি তেওঁৰ তাৎক্ষণিক আৰু চৰ্তহীন মুক্তিৰ দাবী জনাইছে। সংগঠনটোৱে কৰ্তৃপক্ষক আইনৰ শাসন বজাই ৰাখি সংবাদ মাধ্যমৰ স্বাধীনতা আৰু সাংবাদিকৰ অধিকাৰ সুৰক্ষিত কৰাৰ আহ্বান জনাইছে। তেওঁলোকে সতৰ্ক কৰি দিয়ে যে এনে কৌশল বন্ধ নহ’লে সংবিধানত সন্নিবিষ্ট গণতান্ত্ৰিক মূল্যবোধৰ ক্ষতি হ’ব।
