সাংবাদিক দিলোৱাৰ হুছেইন মজুমদাৰক পাণবজাৰ আৰক্ষীয়ে দ্বিতীয়টো গোচৰত পুনৰ গ্ৰেপ্তাৰ কৰাৰ পিছতে পাণবজাৰ আৰক্ষী থানাৰ সন্মুখত সাংবাদিকসকলে তীব্ৰ প্ৰতিবাদ জনাইছে। মুখত ক’লা কাপোৰ বান্ধি মৌন ধৰ্ণাত বহি তেওঁলোকে এই গ্ৰেপ্তাৰক স্বৈৰাচাৰী বুলি অভিহিত কৰি দিলোৱাৰৰ শীঘ্ৰ মুক্তিৰ দাবী উত্থাপন কৰিছে। কেইবাগৰাকী জ্যেষ্ঠ সাংবাদিকৰ নেতৃত্বত এই প্ৰতিবাদত বিভিন্ন মিডিয়া হাউছৰ সাংবাদিকে অংশ লৈছিল।
অসম সমবায় এপেক্স বেংকৰ পৰিচালন সঞ্চালকৰ অভিযোগৰ ভিত্তিত ৰুজু গোচৰত আজি দিলোৱাৰক লখৰাস্থিত কেন্দ্ৰীয় কাৰাগাৰৰ পৰা গ্ৰেপ্তাৰ কৰি পাণবজাৰ থানালৈ আনি থোৱা হয়। প্ৰথম গোচৰত (১১০/২৫) আদালতৰ পৰা জামিন লাভ কৰাৰ পিছতো নতুন গোচৰত তেওঁৰ গ্ৰেপ্তাৰে সাংবাদিক সমাজত তীব্ৰ প্ৰতিক্ৰিয়াৰ সৃষ্টি কৰিছে। পাণবজাৰ থানাত ১১১/২৫ নম্বৰ গোচৰত ভাৰতীয় ন্যায় সংহিতাৰ ৩২৯, ৩২৪(৪), ৩৫১(২), ৩০৯(৪) আৰু ১১৫ ধাৰাৰ অধীনত মজুমদাৰৰ বিৰুদ্ধে অভিযোগ ৰুজু হৈছে। এজাহাৰত কোৱা হৈছে যে, ২৫ মাৰ্চত তেওঁ বেংকৰ কাৰ্যালয়ত বেআইনীভাৱে প্ৰৱেশ কৰি নথিপত্ৰ চুৰিৰ চেষ্টা কৰিছিল।
গুৱাহাটী প্ৰেছ ক্লাবে এই ঘটনাৰ তীব্ৰ নিন্দা জনাইছে। ক্লাবৰ সহকাৰী সাধাৰণ সম্পাদক তথা জ্যেষ্ঠ সাংবাদিক দিলোৱাৰ হুছেইনক জামিনৰ পিছতো পুনৰ গ্ৰেপ্তাৰ কৰাটো অগণতান্ত্ৰিক বুলি উল্লেখ কৰি প্ৰেছ ক্লাবে তেওঁৰ বিনাচৰ্তে মুক্তিৰ দাবী জনাইছে। প্ৰেছ ক্লাবৰ মুখপাত্ৰই কয়, “সাংবাদিকৰ যিকোনো সমস্যাত আমি সদায় তেওঁলোকৰ সৈতে আছো। এই প্ৰতিবাদ আমাৰ সংহতিৰ প্ৰতীক।”
