গুৱাহাটী বিশ্ববিদ্যালয়ত আজি এক উত্তপ্ত পৰিস্থিতিৰ সৃষ্টি হৈছে। বিশ্ববিদ্যালয়ৰ পৰীক্ষা নিয়ন্ত্ৰকৰ দুৰ্ব্যৱহাৰৰ বিৰুদ্ধে ছাত্ৰ-ছাত্ৰীসকলে তীব্ৰ প্ৰতিবাদ জনাইছে। প্ৰতিবাদৰ মাজতে উপাচাৰ্য ড০ ননীগোপাল মহন্তই ছাত্ৰসকলক শান্ত কৰাৰ পৰিৱৰ্তে মাটিত বহি ‘মোক মাৰা, মোক মাৰা’ বুলি চিঞৰি হৈ-হাল্লা কৰা দেখা গৈছে। এই আচৰণে ছাত্ৰ সমাজক আৰু উত্তেজিত কৰি তুলিছে, ফলত বিশ্ববিদ্যালয় চৌহদ পুনৰ উত্তপ্ত হৈ পৰে।
জানিব পৰা মতে, পৰীক্ষা নিয়ন্ত্ৰক কন্দৰ্প শৰ্মাই আজি একাংশ ছাত্ৰ-ছাত্ৰীৰ সৈতে দুৰ্ব্যৱহাৰ কৰিছিল, যাৰ ফলত স্নাতকোত্তৰ ছাত্ৰ সংস্থা (PGSU) উত্তেজিত হৈ পৰে। প্ৰতিবাদৰ সময়ত উপাচাৰ্যই কাৰ্যালয়ৰ বাহিৰলৈ ওলাই আহি ছাত্ৰসকলক ধমক দিয়ে। তেওঁ এজন ছাত্ৰক ফেঁপৰি পতা দেখি নিজৰ বুকুত হাত থপৰাই ‘মোৰ সৈতে এইবাৰ নচলিব’ বুলি কয় আৰু ‘তোমালোকে মোক ১০ মিনিট সময় দিব নোৱাৰা যদি, মোক মাৰা’ বুলি হৈ-হাল্লা কৰে। এনে আচৰণে পৰিস্থিতি অধিক জটিল কৰি তুলিছে।
ছাত্ৰ সমাজে পৰীক্ষা নিয়ন্ত্ৰক কন্দৰ্প শৰ্মাৰ অপসাৰণৰ দাবী জনাইছে। উপাচাৰ্যৰ এই কাৰ্যকলাপে তীব্ৰ প্ৰতিক্ৰিয়াৰ সৃষ্টি কৰিছে। এগৰাকী উচ্চ শিক্ষানুষ্ঠানৰ মুৰব্বীৰ পৰা এনে আচৰণে ছাত্ৰ সমাজৰ ভৱিষ্যত পৰিচালনাৰ প্ৰতি প্ৰশ্ন উত্থাপন কৰিছে।
ইপিনে, অসম প্ৰদেশ কংগ্ৰেছে এই আন্দোলনৰ প্ৰতি সমৰ্থন জনাই প্ৰতিক্ৰিয়া ব্যক্ত কৰিছে। কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰাই কয়, “শিক্ষা ব্যৱস্থাত বিদ্যায়তনিক পৰিৱেশ লাহে লাহে ধূসৰ হৈ আহিছে। উচ্চতৰ মাধ্যমিক প্ৰথম বৰ্ষৰ পৰীক্ষা সময়মতে সঠিকভাৱে অনুষ্ঠিত কৰিব নোৱাৰাৰ পিছত, এতিয়া গুৱাহাটী বিশ্ববিদ্যালয়েও ছাত্ৰ-ছাত্ৰীক সময়মতে মাৰ্কশ্বিট আৰু প্ৰমাণপত্ৰ দিয়াত ব্যৰ্থ হৈছে। এই চৰকাৰখনে কেৱল সাম্প্ৰদায়িক ৰাজনীতিহে ভালকৈ কৰিব পাৰে। আমি চৰকাৰক ছাত্ৰ-ছাত্ৰীৰ ভৱিষ্যত ধ্বংস নকৰিবলৈ পুনৰ সকীয়াই দিছো।”
