২ এপ্ৰিলত অনুষ্ঠিত হ’বলগীয়া পৰিষদীয় নিৰ্বাচনৰ আগমুহূৰ্তত ৰাভা হাছংৰ বিভিন্ন সমষ্টি এলেকা উত্তপ্ত হৈ উঠিছে। এনে এক পৰিস্থিতিত মঙলবাৰে নিশা বকো আৰক্ষী থানা এলেকাৰ ২৪ নং লুকী পৰিষদীয় সমষ্টিৰ অন্তৰ্গত কেইবাটাও ঠাইত অচিনাক্ত দুষ্কৃতিকাৰীৰ আক্ৰমণৰ ঘটনা প্ৰকাশ পাইছে। এই ঘটনাক লৈ সম্প্ৰদায়টোত চেপা উত্তেজনা বিৰাজ কৰিছে।
বাতৰি অনুসৰি, জয়পুৰৰ বনগাঁও বুঢ়ীগাঁৱত চৰাব ৰাভাৰ ঘৰত প্ৰথমে আক্ৰমণ কৰা হয়। দুষ্কৃতিকাৰীসকলে তেওঁৰ ঘৰ লণ্ডভণ্ড কৰাৰ লগতে বাঁহৰ যাঠীৰে খিৰিকীৰে আক্ৰমণ কৰাত শুই থকা চৰাব ৰাভাৰ পুত্ৰৰ প্ৰাণ হাতৰ পৰা সৰিবলৈ ওচৰ চাপিছিল। পিছত দলটোৱে গোবৰ্ধন ৰাভাৰ ঘৰ আৰু উলুপাৰত দুটা পৰিয়ালৰ ঘৰত আক্ৰমণ চলায়।
ইয়াৰোপৰি, গামেৰীমূৰাত ৰাভা যৌথ সংগ্ৰাম সমিতিৰ নিৰ্বাচনী কাৰ্যালয় লণ্ডভণ্ড কৰি অগ্নিসংযোগ কৰা হয়। দুষ্কৃতিকাৰীসকলে কাৰ্যালয়ৰ চকী-মেজ ভাঙি দুখন বাইকো ধ্বংস কৰে। লগতে নিতেন ৰাভা, দেবে ৰাভা, অভিজিত ৰাভা, কুশল ৰাভা আৰু সুবল ৰাভাৰ ঘৰতো ক্ষয়ক্ষতি কৰে।
ঘটনাৰ খবৰ পাই বকো আৰক্ষীয়ে ঘটনাস্থলীত উপস্থিত হৈ পৰিস্থিতি নিয়ন্ত্ৰণত আনে। ইতিমধ্যে বকো থানাত কেইবাটাও পক্ষই পৃথকে পৃথকে এজাহাৰ দাখিল কৰা বুলি জনা গৈছে।
