গুৱাহাটীৰ অ’ডিটেক ষ্টুডিঅ’ত সম্প্ৰতি ৰোমান্টিক দৃশ্য-শ্ৰাব্য গীত "এটি এটি কথা"ৰ মুক্তি দিয়া হৈছে। বিশিষ্ট শিল্পী শান্তা উজীৰে গীতটো আনুষ্ঠানিকভাৱে উন্মোচন কৰে। গীতটোত গহপুৰৰ কণ্ঠশিল্পী সুৰভী সোনমনি হাজৰিকাই কণ্ঠদান কৰাৰ লগতে সুৰ, ৰচনা কৰিছে।। উন্মোচন অনুষ্ঠানত সংগীতজ্ঞ মানস হাজৰিকা, সংগীত পৰিচালক পলাশ গগৈ, সংগীতকাৰ দ্বীপ ৰাজবংশীকে ধৰি সংগীতজগতৰ বহু গৰাকী বিশিষ্ট ব্যক্তিয়ে অংশগ্ৰহণ কৰিছিল।
গীতটোত এগৰাকী নাৰীৰ সীমাহীন ভালপোৱাৰ অনুভূতি প্ৰকাশ পাইছে, য'ত পোৱা-নোপোৱাৰ সুখ-দুখক কেন্দ্ৰীয় স্থান দিয়া হৈছে। পলাশ গগৈৰ সংগীত পৰিচালনা, অপুৰাজ গগৈৰ ভিডিঅ’ পৰিচালনা আৰু অম্লান জ্যোতি ৰাজখোৱাৰ চিনেমেট'গ্ৰাফীয়ে গীতটোক এক অনন্য ৰূপ দিছে। দীপাংকৰ মহন্ত, জুনু নাথ, অনুষ্কা কাশ্যপ, আমাইৰা দিত্য আৰু সুৰভীৰ অভিনয়ে গীতটোৰ আবেদন অধিক বঢ়াই তুলিছে।
এছ এছ প্ৰডাকচনৰ বেনাৰত নিৰ্মিত গীতটি ইতিমধ্যে ইউটিউবত মুকলি কৰা হৈছে। কথাৰ সাৱলীলতা, সুৰৰ মাধুৰ্য আৰু কণ্ঠৰ কোমলতাই গীতটোক এক বিশেষ মাত্ৰা প্ৰদান কৰিছে। সংগীতপ্ৰেমীসকলে গীতটো উপভোগ কৰিব পাৰে।
