অসম ৰাজ্যিক বিদ্যালয় শিক্ষা পৰিষদৰ (SEBA) অধ্যক্ষ ৰমেশ চন্দ্ৰ জৈনক চাকৰিৰ পৰা বৰ্খাস্ত কৰাৰ দাবীত আজি গুৱাহাটীৰ বামুণীমৈদামত অৱস্থিত পৰিষদৰ কাৰ্যালয় ঘেৰাও কৰে কংগ্ৰেছৰ নেতা-কৰ্মীসকল। কংগ্ৰেছে অভিযোগ কৰিছে যে জৈনৰ নেতৃত্বত পৰিষদে ছাত্ৰ-ছাত্ৰীৰ ভৱিষ্যত ধ্বংস কৰিবলৈ অপচেষ্টা চলাইছে, যাৰ ফলত অসমত পৰীক্ষাৰ প্ৰশ্নকাকত ফাদিলৰ ধাৰাবাহিক ঘটনাই শিক্ষা ব্যৱস্থাক অস্থিৰ কৰি তুলিছে।
গুৱাহাটী মহানগৰ কংগ্ৰেছৰ নেতৃত্বত কেইবা শ কংগ্ৰেছ কৰ্মীয়ে "হিমন্ত বিশ্ব শৰ্মা হায় হায়", "শিক্ষামন্ত্ৰীৰ কাম নাই", "ৰমেশ জৈনক খেদা", "বিজেপিৰ চৰকাৰ ৰাইজক নালাগে" আদি জোৰদাৰ শ্ল’গান দি শিক্ষামন্ত্ৰী ৰণজিৎ পেগুৰ তাৎক্ষণিক পদত্যাগ দাবী কৰে। প্ৰতিবাদকাৰীসকলে কয় যে মাত্ৰ চাৰি দিনৰ ভিতৰত তিনিখন পৰীক্ষাৰ প্ৰশ্নকাকত ফাদিলৰ ঘটনাই চৰকাৰৰ ব্যৰ্থতা স্পষ্ট কৰি তুলিছে।
ইয়াৰ আগতে, ২০ মাৰ্চত উচ্চতৰ মাধ্যমিকৰ অংকৰ পৰীক্ষা স্থগিত ৰাখিবলগীয়া হৈছিল। তাৰ পিছত অৰ্থনীতিৰ পৰীক্ষাৰ প্ৰশ্নকাকত ফাদিল হোৱাত পুনৰ বিতৰ্কৰ সৃষ্টি হৈছিল। অৱশেষত, ২৪ মাৰ্চৰ পৰা আৰম্ভ হ’বলগীয়া পাঁচটা পৰীক্ষা চৰকাৰে বাতিল কৰাত হাজাৰ হাজাৰ ছাত্ৰ-ছাত্ৰী আৰু অভিভাৱক অনিশ্চিয়তাত ভূগিছে।
অসম প্ৰদেশ কংগ্ৰেছ কমিটিৰ (APCC) প্ৰাক্তন সভাপতি ৰিপুন বৰাই মুখ্যমন্ত্ৰী হিমন্ত বিশ্ব শৰ্মাক "অসমৰ ইতিহাসৰ কলংকিত মুখ্যমন্ত্ৰী" বুলি অভিহিত কৰি কয়, "হিমন্তই দীৰ্ঘদিন শিক্ষামন্ত্ৰী হৈ থকাৰ পিছতো শিক্ষা ব্যৱস্থাৰ কোনো সংস্কাৰ কৰিব পৰা নাই। ৰবৰ ষ্টাম্পৰ দৰে নিষ্ক্ৰিয় শিক্ষামন্ত্ৰী ৰণজিৎ পেগুৱে ছাত্ৰ-ছাত্ৰীৰ ভৱিষ্যত নষ্ট কৰিছে!"
গুৱাহাটী মহানগৰ কংগ্ৰেছৰ সভাপতি গোপাল শৰ্মাই এটা স্মাৰকপত্ৰ উপ-আৰক্ষী আয়ুক্তক দি শিক্ষামন্ত্ৰীৰ পদত্যাগ দাবী কৰে। কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰাই কয়, "মুখ্যমন্ত্ৰীয়ে ৰমেশ জৈনৰ প্ৰতি ইমান দৰদ কিয়? তেওঁক অব্যাহতি নিদিয়ালৈকে আমাৰ আন্দোলন অব্যাহত থাকিব!"
কংগ্ৰেছে স্পষ্ট কৰি দিছে যে যদি চৰকাৰে তৎক্ষণাৎ SEBAৰ অধ্যক্ষ আৰু শিক্ষামন্ত্ৰীক দায়িত্বৰ পৰা আঁতৰাই নিয়ে, তেন্তে অসমজুৰি তীব্ৰ আন্দোলনৰ ডাঙৰ কাৰ্যসূচী হাতত ল’ব। প্ৰতিবাদত গুৱাহাটীৰ প্ৰাক্তন মেয়ৰ কুশল শৰ্মা, APCCৰ সম্পাদক মইনাজান বেগম, আৰু বিভিন্ন ব্লকৰ নেতাসকলেও অংশগ্ৰহণ কৰিছিল।
অসমৰ শিক্ষা ব্যৱস্থা এতিয়া সংকটৰ সন্মুখীন। চৰকাৰে যদি দ্ৰুত ব্যৱস্থা নলয়, তেন্তে ছাত্ৰ-ছাত্ৰীৰ ক্ষতিৰ উপৰিও, ৰাজনৈতিক অস্থিৰতাও বাঢ়িব।
