অসমৰ ৰাজধানী গুৱাহাটী উত্তাল হৈ উঠিছে অপ্ৰাদেশীকৃত শিক্ষক, কৰ্মচাৰী আৰু NPS (নতুন পেন্সন ব্যৱস্থা)ৰ অধীনত থকা কৰ্মচাৰীসকলৰ তীব্ৰ প্ৰতিবাদেৰে। দিছপুৰ লাষ্টগেটৰ পৰা চচললৈকে বিধানসভাৰ বাজেট অধিৱেশনৰ মাজতে চৰকাৰৰ বিৰুদ্ধে প্ৰতিবাদে গোটেই মহানগৰক অস্থিৰ কৰি তুলিছে।
অপ্ৰাদেশীকৃত শিক্ষক-কৰ্মচাৰী সন্থাই দিছপুৰ লাষ্টগেটৰ পৰা বিধানসভালৈ মাৰ্চ কৰাৰ পৰিকল্পনা কৰিছিল, কিন্তু প্ৰতিবাদৰ আগতেই আৰক্ষীয়ে একাংশক আটক কৰে। তাৰ পিছতো প্ৰতিবাদকাৰীয়ে ৰাজপথত বাগৰি-বাগৰি মুখ্যমন্ত্ৰী হিমন্ত বিশ্ব শৰ্মাৰ নীতিৰ তীব্ৰ সমালোচনা কৰে। এগৰাকী শিক্ষকে কয়, "২০-২৫ বছৰ ধৰি চাকৰি কৰিও আমি প্ৰাদেশিকীকৰণৰ সৈতে ন্যায্য সুবিধা পোৱা নাই। অথচ এজন বিধায়কে মাত্ৰ ৫ বছৰ সেৱা দি আজীৱন পেন্সন ভোগ কৰে—এই বৈষম্য কিয়?"
শিক্ষকসকলে স্পষ্টকৈ কয় যে যদি অতি সোনকালে তেওঁলোকৰ দাবী পূৰণ নহয়, তেন্তে "শদিয়াৰ পৰা ধুবুৰীলৈকে অসমজুৰি মৰ্চা, ধৰ্ণাগ্ৰহ আদি কঠোৰ আন্দোলনৰ কাৰ্যসূচী লোৱা হ’ব।"
ইফালে, সদৌ অসম চৰকাৰী NPS কৰ্মচাৰী সংস্থাই চচলত ধৰ্ণাগ্ৰহ কৰি পুৰণি পেন্সন ব্যৱস্থা পুনৰ্বহাল কৰাৰ দাবী তুলিছে। তেওঁলোকে কয়, "এজন বিধায়ক বা সাংসদে ৫ বছৰৰ বাবে নিৰ্বাচিত হৈ আজীৱন পেন্সন পায়, কিন্তু ৩৫-৪০ বছৰ চাকৰি কৰা কৰ্মচাৰীয়ে কিয় বঞ্চিত হ’ব লাগে?"
প্ৰতিবাদকাৰীসকলে মুখ্যমন্ত্ৰীক সোধা প্ৰশ্ন— "আপোনাৰ মানৱতা, দয়া নাই নেকি? আমাৰ ন্যায্য দাবীৰ প্ৰতি আপোনাৰ চৰকাৰৰ নীতি কিয় এনেকৈ নিৰ্দয়?"
মুখ্যমন্ত্ৰীয়ে অসমক "প্ৰতিবাদ-মুক্ত ৰাজ্য" বুলি দাবী কৰাৰ বিপৰীতে বৰ্তমান গুৱাহাটীত নিতৌ নতুনকৈ প্ৰতিবাদৰ সূচনা হৈছে। শিক্ষক, কৰ্মচাৰী, আইনজীৱী আদি সকলো শ্ৰেণীৰ লোক চৰকাৰৰ নীতিৰ বিৰুদ্ধে ৰাস্তালৈ ওলাই আহিছে। প্ৰশ্ন উঠিছে— "ইয়াৰ পিছতো মুখ্যমন্ত্ৰী হিমন্ত বিশ্ব শৰ্মাই এই সমস্যাসমূহৰ প্ৰতি গুৰুত্ব দিবনে?"
চৰকাৰে যদি সময়মতে এই সংকট সমাধানৰ পথ নাপায়, তেন্তে অসমত আন্দোলনৰ ঢৌ আৰু বেছি হ’ব বুলি আশংকা কৰা হৈছে।
