গুৱাহাটী উচ্চ ন্যায়ালয়ৰ বাৰ এছ’চিয়েচনে আজি উচ্চ ন্যায়ালয় ৰংমহললৈ স্থানান্তৰৰ চৰকাৰী প্ৰস্তাৱৰ বিৰুদ্ধে পুনৰ তীব্ৰ প্ৰতিবাদ সাব্যস্ত কৰিছে। এছ’চিয়েচনে তিনি ঘণ্টীয়া অৱস্থান ধৰ্মঘট পালন কৰি উচ্চ ন্যায়ালয় স্থানান্তৰক যুক্তিহীন বুলি কটাক্ষ কৰে। তেওঁলোকে স্পষ্টকৈ ঘোষণা কৰে যে ৰংমহললৈ উচ্চ ন্যায়ালয় স্থানান্তৰৰ সলনি উত্তৰ-পূৰ্বাঞ্চলৰ বাবে উচ্চতম ন্যায়ালয়ৰ এটা বিচাৰপীঠ স্থাপনৰ দাবী জনাইছে।
এছ’চিয়েচনৰ নেতৃত্বই কয়, “আমি ১০ বছৰৰ আগতেই প্ৰধানমন্ত্ৰী আৰু ৰাষ্ট্ৰপতিক উচ্চতম ন্যায়ালয়ৰ উত্তৰ-পূৰ্বাঞ্চলীয় বিচাৰপীঠৰ দাবী জনাইছিলো। গুৱাহাটী উচ্চ ন্যায়ালয় স্থানান্তৰ কৰাৰ পৰিৱৰ্তে যদি ৰংমহলত এই বিচাৰপীঠ স্থাপন কৰা হয়, তেন্তে অসমৰ সন্মান বেছি হ’ব।” তেওঁলোকে এই পদক্ষেপক চৰকাৰ আৰু বাৰৰ মাজত সমাধানৰ এক সম্ভাৱ্য পথ বুলি অভিহিত কৰে।
ইয়াৰোপৰি, বাৰ এছ’চিয়েচনে উচ্চ ন্যায়ালয় স্থানান্তৰৰ সিদ্ধান্তত তেওঁলোকৰ মতামত নোলোৱাকৈ চৰকাৰে একপক্ষীয়ভাৱে কাৰ্য্য কৰাৰ বাবে অসন্তোষ প্ৰকাশ কৰে। এছ’চিয়েচনৰ নেতৃত্বই প্ৰশ্ন তুলি কয়, “কিয় আমি স্থানান্তৰ মানি ল’ম? আজি এয়া চৰকাৰে এঠাইৰ পৰা আন ঠাইলৈ নিব খুজিছে, কাইলৈ নতুন চৰকাৰে আকৌ বেলেগ ঠাইলৈ নিব খুজিলে কি হ’ব?”
উল্লেখযোগ্য যে, ১৯ মাৰ্চত উচ্চ ন্যায়ালয় স্থানান্তৰৰ বিষয়ে আলোচনাৰ বাবে এক সাধাৰণ সভা অনুষ্ঠিত হৈছিল, য’ত মুখ্য ন্যায়াধীশ, অন্যান্য ন্যায়াধীশ, বিভিন্ন ৰাজ্যৰ বাৰ কাউন্সিল আৰু সদৌ অসম উকীল সন্থাৰ প্ৰতিনিধিসকল উপস্থিত আছিল। কিন্তু বাৰ এছ’চিয়েচনে এই সভা বৰ্জন কৰে আৰু স্থানান্তৰ প্ৰক্ৰিয়াত তেওঁলোকৰ মতামত উপেক্ষা কৰা বুলি অভিযোগ কৰে।
আজিৰ প্ৰতিবাদত এছ’চিয়েচনে চৰকাৰক স্পষ্টীকৰণ দাবী কৰিছে—কিয় বাৰৰ সৈতে আলোচনা নকৰাকৈ উচ্চ ন্যায়ালয় স্থানান্তৰৰ সিদ্ধান্ত লোৱা হৈছে।
