ৰাজ্যত নৱম শ্ৰেণী আৰু উচ্চতৰ মাধ্যমিকৰ প্ৰথম বৰ্ষৰ প্ৰশ্নকাকত ফাদিল হোৱাৰ ঘটনাক লৈ অসম প্ৰদেশ কংগ্ৰেছে তীব্ৰ প্ৰতিক্ৰিয়া ব্যক্ত কৰিছে। প্ৰশ্নকাকত ফাদিল হোৱাৰ ঘটনাৰ বিৰোধ কৰি অসম প্ৰদেশ কংগ্ৰেছৰ সভাপতি ভূপেন কুমাৰ বৰাই শিক্ষামন্ত্ৰী ৰণোজ পেগুৰ পদত্যাগ দাবী কৰিছে। এক বিবৃতিৰ যোগে ভূপেন কুমাৰ বৰাই কয় যে উচ্চতৰ মাধ্যমিকৰ প্ৰথম বৰ্ষৰ অংকৰ পৰীক্ষা হঠাতে কোনো কাৰণ নোহোৱাকৈ পিছুৱাই দিছে পৰীক্ষা নিয়ন্ত্ৰকে। একেদৰে শেহতীয়াকৈ গম পোৱা মতে, বৰপেটা জিলাৰ নৱম শ্ৰেণীৰ অংকৰ পৰীক্ষাৰ প্ৰশ্নকাকত আগতীয়াকৈ প্ৰকাশ হৈছে।
ছাত্ৰ-ছাত্ৰীৰ ভৱিষ্যতক লৈ চৰকাৰৰ এই ধৰণৰ হেতালি খেলিছে কিয়? চৰকাৰখনে ছাত্ৰ-ছাত্ৰীৰ বছৰটোৰ কষ্টৰ ফলক লৈ ল’ৰা-ধেমালি খেলাটো নিন্দনীয়ই নহয়, ই অক্ষমণীয় অপৰাধ। ছাত্ৰ-ছাত্ৰীৰ ভৱিষ্যতক লৈ বাৰে বাৰে এনেধৰণৰ হেতালি খেলি অহা কথাটোৱে ছাত্ৰ-ছাত্ৰীক মানসিকভাৱে হাৰাশাস্তি কৰিছে। অভিযোগ উত্থাপন কৰি বৰাই কয় যে মুখ্যমন্ত্ৰী হিমন্ত বিশ্ব শৰ্মাৰ আমোলত অসমৰ ছাত্ৰ-ছাত্ৰীৰ ভৱিষ্যত একেবাৰে সুৰক্ষিত নহয়। বাৰে বাৰে প্ৰশ্নকাকত আগতীয়াকৈ ফাদিল হৈছে। নিযুক্তি পৰীক্ষাৰ কাকতসমূহো আগতীয়াকৈ প্ৰকাশ হৈছে। এইখন চৰকাৰে বিদ্যায়তনিক পৰিৱেশ গঢ়াৰ পৰিৱৰ্তে এক হৈ-চৈ আৰু ৰং-ৰইছৰ পৰিৱেশৰ মাজত শিক্ষাৰ মূল বিষয়কসমূহক পাতল কৰাৰ অভিযোগ আনিছে প্ৰদেশ কংগ্ৰেছৰ সভাপতিগৰাকীয়ে।
শেহতীয়াকৈ মুখ্যমন্ত্ৰীয়ে মেট্ৰিক পৰীক্ষাৰ সমাজ অধ্যয়ন বিষয়ত ১০ নম্বৰকৈ বঢ়াই দিয়াৰ যি ঘোষণা কৰিছে, সেয়াও বিজ্ঞানসন্মত নহয় বুলি বৰাই উল্লেখ কৰে। সমগ্ৰ ঘটনাৰ বাবে নৈতিক দায়িত্ব স্বীকাৰ কৰা অসমৰ শিক্ষামন্ত্ৰী ৰণোজ পেগুৱা পদত্যাগ কৰা উচিত বুলিও ভূপেন বৰাই উল্লেখ কৰে।
