অসমৰ মুখ্যমন্ত্ৰী হিমন্ত বিশ্ব শৰ্মাক বাৰে বাৰে বিজ্ঞান আৰু প্ৰযুক্তি বিদ্যা বিশ্ববিদ্যালয় মেঘালয় চমুকৈ ইউএছটিএমক আক্ৰমণৰ লক্ষ্য কৰি লোৱাৰ লগতে পৰীক্ষাত নম্বৰ বঢ়াই দিয়াৰ ছাত্ৰৰ অভিযোগৰ ভিত্তিত ইউএছটিএমৰ স্বত্বাধিকাৰী মহবুবুল হকক গ্ৰেপ্তাৰ কৰাত বৰ্তমানেও হক ন্যায়িক জিম্মাত কাৰাগাৰত বন্দী হৈ আছে৷ তাৰ মাজতে ইউএছটিএমক লৈ মেঘালয়ত দুই মেৰুত বিভাজিত হোৱা দেখা গৈছে বিজেপি আৰু এনপিপি দলক৷ বিজেপি আৰু এনপিপি দলে মিত্ৰতাৰে মেঘালয়ত চৰকাৰ চলাই থাকিলেও এনপিপ দল তথা দলৰটোৰ মুৰব্বী কনৰাড চাংমাই সদায়েই ইউএছটিএমৰ পক্ষত কথা কোৱা পৰিলক্ষিত হয়৷ আনহাতে অসমৰ বিজেপি নেতা মুখ্যমন্ত্ৰী হিমন্ত বিশ্ব শৰ্মাৰ সুৰতে সুৰ মিলাই মেঘালয়ৰ বিজেপি নেতাই ইউএছটিএমক বিৰোধ কৰা পৰিলক্ষিত হৈ আহিছে৷
তাৰ মাজতে বিজেপিয়ে ইউএছটিএমক মেঘালয় চৰকাৰে আৰ্থিক সাহায্য প্ৰদান কৰা বুলি অভিযোগ আনিছে বিজেপিৰ নেতাই৷ চৰকাৰে আৰ্থিক সাহায্য দিয়াৰ অভিযোগ উত্থাপন কৰিছে মেঘালয়ৰ বিজেপিৰ নেতাই৷ মেঘালয় ৰাজ্যিক বিজেপিয়ে ৰাজ্য চৰকাৰক প্ৰশ্ন কৰিছিল যে ইউএছটিএম ব্যক্তিগত নে চৰকাৰী প্ৰতিষ্ঠান৷ লগতে মাচুলৰ গাঁথনি চৰকাৰী প্ৰতিষ্ঠানতকৈ কিয় অধিক সেই সন্দৰ্ভত প্ৰশ্ন উত্থাপন কৰিছিল। বিজেপিৰ নেতাৰ অভিযোগৰ প্ৰত্যুত্তৰ দি মেঘালয় চৰকাৰৰ মন্ত্ৰী তথা এনপিপিৰ জ্যেষ্ঠ নেতাই বিজেপিক অনুমান কৰি কথা নক’বলৈ স্পষ্ট কৰি দিছে৷ বিজ্ঞান আৰু প্ৰযুক্তি বিদ্যা বিশ্ববিদ্যালয় মেঘালয় চমুকৈ ইউএছটিএমক লৈ অনুমান কৰি কথা নকব বুলি ক্ষোভ জাহিৰ কৰিছে মেঘালয় চৰকাৰৰ মন্ত্ৰী আমপাৰিন লিংডোৱে৷ মেঘালয়ৰ এনপিপি নেতৃত্বাধীন চৰকাৰৰ অংশীদাৰী দল বিজেপিক কঠোৰ ভাষাৰে স্পষ্ট কৰি অনুমান কৰি কথা নকব বুলি কয় লিংডোৱে৷ ইউএছটিএমক ৰাজ্য চৰকাৰে কোনো বিত্তীয় অনুমোদন দিয়া নাই বুলি স্পষ্ট কৰে স্বাস্থ্য মন্ত্ৰীগৰাকীয়ে৷ স্বাস্থ্য মন্ত্ৰীগৰাকীয়ে কয় যে যদি আৰ্থিক সাহায্য দিয়াৰ সিদ্ধান্ত লোৱা হয় তেতিয়া সেই কথা ৰাজহুৱা কৰা হ’ব। অনুগ্ৰহ কৰি অনুমান কৰি তথা নক’ব। ধাৰণা হৈছে অপ্ৰমাণিত তথ্য। চৰকাৰে কোনো অনুমোদন প্ৰদান কৰিলে আপোনালোকক অৱগত কৰা হ'ব। মন্ত্ৰী লিংডোৱে স্পষ্ট কৰে যে ইউএছটিএমৰ তৰফৰ পৰা ৰাজ্য চৰকাৰলৈ এটা অনুৰোধ আহিছে৷ কিন্তু কোনো সিদ্ধান্ত লোৱা হোৱা নাই। আমি সিদ্ধান্ত ল’লে ৰাইজক জনাম। জানিব পৰা মতে, ইউএছটিএম কৰ্তৃপক্ষই ৰাজ্য চৰকাৰক পিএ চাংমা আন্তঃৰাষ্ট্ৰীয় চিকিৎসা মহাবিদ্যালয়ৰ বাবে ২৩৩ কোটি টকাৰ সুদ-মুক্ত ঋণ প্ৰদান কৰিবলৈ অনুৰোধ জনাইছে। বিনিময়ত ইউএছটিএম আৰু মেঘালয় চৰকাৰৰ যুটীয়া উদ্যোগত ৰাজ্য চৰকাৰক মেডিকেলত ৪০ খন আসন আৱণ্টন কৰা হ'ব অফাৰ কৰিছে৷ চৰকাৰী মাচুল গাঁথনিৰ অধীনত ২৫ খন আৰু বিশ্ববিদ্যালয়ৰ মাচুল গাঁথনিৰ আধাত ১৫ খন আসন আৱণ্টন কৰা হ'ব। লিংডোৱে বিজেপি অভিযোগ সন্দৰ্ভত আৰু কয় যে বহু প্ৰতিষ্ঠানে চৰকাৰৰ ওচৰত অনুৰোধ দাখিল কৰে৷ কিন্তু সকলোবোৰৰ পুংখানুপুংখ মূল্যাঙ্কন কৰা হয়।
চৰকাৰে পৰিস্থিতি, প্ৰভাৱ আৰু প্ৰত্যাশিত ফলাফলৰ কথা বিবেচনা কৰি প্ৰতিটো অনুৰোধ পৰীক্ষা কৰে। ইউএছটিএমক কেৱল ৰাজ্য চৰকাৰে পিএ চাংমা চিকিৎসা মহাবিদ্যালয় নামৰ চিকিৎসা মহাবিদ্যালয়খন পৰিচালনা কৰিবলৈ এনঅ'চি প্ৰদান কৰিছে। তাৰ বাহিৰে অন্য একো দিয়া নাই। অনুমানৰ ওপৰত আধাৰিত কৰি বিতৰ্ক কৰাটো অনুচিত। তেনেদৰে আমি শাসন নচলাও৷ লিংডোৱে লগতে উল্লেখ কৰে যে মেঘালয়ত ব্যক্তিগতভাৱে পৰিচালিত এখন চিকিৎসা মহাবিদ্যালয় লাভজনক৷ কিয়নো স্থানীয় শিক্ষাৰ্থীসকলক উচ্চ আৰু কাৰিকৰী শিক্ষাৰ সুবিধা প্ৰদান কৰিব৷ যিটো আগতে উপলব্ধ নাছিল। এনঅ'চিত উল্লেখ কৰা চৰ্তাৱলী আৰু নিয়মাৱলীয়ে স্থানীয় শিক্ষাৰ্থীসকলক শিক্ষাৰ সুবিধা পোৱাটো নিশ্চিত কৰে। শীঘ্ৰেই আৰু দুখন চৰকাৰ পৰিচালিত চিকিৎসা মহাবিদ্যালয়ৰ কাম আৰম্ভ হ'ব। লিংডোৱে পুনৰ কয় যে আৰম্ভণিৰ পৰাই চৰকাৰে প্ৰতিটো সিদ্ধান্তৰ ভাল-বেয়া বিশ্লেষণ কৰি আহিছে। এতিয়ালৈকে কোনো চূড়ান্ত সিদ্ধান্ত লোৱা হোৱা নাই৷ বিজেপিয়ে অনুমান কৰিব পাৰে৷ চৰকাৰে ৰাজ্যখনৰ বাবে সৰ্বশ্ৰেষ্ঠ কি তাৰ ওপৰত আধাৰিত কৰি আগবাঢ়িব। চৰকাৰে এই ধৰণৰ চিকিৎসা মহাবিদ্যালয়খনক অনুমতি দিয়াৰ লাভালাভ আৰু ত্ৰুটিবোৰ সতৰ্কতাৰে মূল্যাঙ্কন কৰিছে৷ বিশেষকৈ স্থানীয় শিক্ষাৰ্থীসকলৰ বাবে সংৰক্ষিত আসনৰ ক্ষেত্ৰত ৰাজ্যখনক সুবিধা প্ৰদান কৰিব। প্ৰতিষ্ঠানটোৰ ভিতৰত যি ঘটে সেয়া চৰকাৰৰ আওতাৰ বাহিৰত আৰু প্ৰশাসনে অধিকাৰক্ষেত্ৰৰ বাহিৰৰ বিষয়ত লিপ্ত নহয়। ইউএছটিএমৰ প্ৰস্তাৱ অনুসৰি ৰাজ্য চৰকাৰত ৪০ খন আসন আৱণ্টন কৰা হ'ব৷
চৰকাৰী মাচুল গাঁথনিৰ অধীনত ২৫ খন আৰু বিশ্ববিদ্যালয়ৰ মাচুল গাঁথনিৰ আধাত ১৫ খন আসন আৱণ্টন কৰা হ'ব। মেঘালয়ৰ শিক্ষাৰ্থীসকলৰ বাবে পেৰামেডিকেল পাঠ্যক্ৰমত একেধৰণৰ আৱণ্টনৰ আৰ্হি প্ৰযোজ্য হ'ব। স্বাস্থ্যসেৱাৰ ক্ষেত্ৰত ইউএছটিএমে মেঘালয়ৰ ৰোগীসকলৰ বাবে চুপাৰ-স্পেচিয়েলিটি স্বাস্থ্যসেৱাৰ বাবে ৫০ শতাংশ ৰেহাই দিব৷ বিনামূলীয়া সাধাৰণ চিকিৎসা সুবিধা দিব। প্ৰস্তাৱৰ এটা মুখ্য উদ্দেশ্য হ'ল আছিয়ান দেশসমূহক পিএ চাংমা আন্তঃৰাষ্ট্ৰীয় চিকিৎসা মহাবিদ্যালয়ত স্বাস্থ্যসেৱা প্ৰাপ্ত কৰিবলৈ আকৰ্ষিত কৰা।
