পঞ্জাৱ চৰকাৰে খালিস্তানি বিচ্ছিন্নতাবাদী আৰু লোকসভাৰ সাংসদ অমৃতপাল সিঙৰ বিৰুদ্ধে ৰাষ্ট্ৰীয় সুৰক্ষা আইন (এনএছএ)ৰ ম্যাদ বৃদ্ধি নকৰাৰ সিদ্ধান্ত লৈছে। ফলত তেওঁক ডিব্ৰুগড় কেন্দ্ৰীয় কাৰাগাৰৰ পৰা পঞ্জাৱলৈ উভতাই অনাৰ পথ প্ৰশস্ত হৈছে। বৰ্তমান এনএছএৰ অধীনত আটক কৰা সিঙৰ আটকৰ ম্যাদ ২০২৫ চনৰ এপ্ৰিলত সমাপ্ত হ’ব। ইয়াৰোপৰি, পঞ্জাৱ আৰক্ষীয়ে ডিব্ৰুগড় কাৰাগাৰত বন্দী থকা অমৃতপাল সিঙৰ সাতজন সহযোগীক ঘূৰাই অনাৰ পৰিকল্পনা কৰিছে, কিয়নো ৰাজ্য চৰকাৰে এনএছএৰ অধীনত আটকৰ ম্যাদ সম্প্ৰসাৰণ নকৰাৰ সিদ্ধান্ত লৈছে।
পঞ্জাৱৰ ডিজিপি গৌৰৱ যাদৱে উল্লেখ কৰিছে যে এনএছএৰ পৰা মুকলি কৰাৰ পিছত এই সাতজন সহযোগীয়ে আজনালা আৰক্ষী থানাত হোৱা আক্ৰমণৰ সন্দৰ্ভত বিচাৰৰ সন্মুখীন হ’ব। আৰক্ষী অধীক্ষক হৰিন্দৰ সিং গিলৰ নেতৃত্বত এটা আৰক্ষী দল ডিব্ৰুগড়ত উপস্থিত হৈছে আৰু তেওঁলোকক আদালতত হাজিৰ কৰোৱাৰ পিছত ট্ৰেঞ্জিট ৰিমাণ্ডৰ বাবে আবেদন কৰিব, যাতে তেওঁলোকক পঞ্জাৱলৈ ঘূৰাই অনা যায়।
২০২৩ চনৰ মাৰ্চ মাহত ডিব্ৰুগড় কেন্দ্ৰীয় কাৰাগাৰত বন্দী থকা অমৃতপাল সিঙৰ তিনি ঘনিষ্ঠ সহযোগীক পঞ্জাৱ আৰক্ষীৰ ২৫ জনীয়া দলে জিম্মাত লৈছিল। স্থানীয় আদালতৰ পৰা অনুমতি লাভ কৰাৰ পিছত গুৰমিত সিং বুক্কানৱালা, ভগৱন্ত সিং আৰু বসন্ত সিঙক জিম্মাত লোৱা হৈছিল। আনহাতে, আইনী জটিলতাৰ বাবে বাকী চাৰিজন সহযোগী—কুলৱন্ত সিং ধালিৱাল, গুৰিন্দৰপাল সিং ঔজলা (গুৰি ঔজলা), হৰজিৎ সিং আৰু দলজিৎ সিং কালচি—ৰ ট্ৰেঞ্জিট ৰিমাণ্ডৰ বাবে পঞ্জাৱ আৰক্ষীয়ে পুনৰ আবেদন কৰিব।
২০২৩ চনৰ আজনালা আৰক্ষী থানা আক্ৰমণৰ গোচৰত এই সাতজনক আনুষ্ঠানিকভাৱে গ্ৰেপ্তাৰ কৰা হৈছিল যদিও এনএছএৰ অধীনত আটক কৰা হৈছিল। পঞ্জাৱ চৰকাৰে এনএছএৰ ম্যাদ বৃদ্ধি নকৰাৰ সিদ্ধান্ত লোৱাৰ বাবে দুবছৰীয়া আটকৰ ম্যাদ ১৯ মাৰ্চত শেষ হ’ব। অৱশ্যে, পৰৱৰ্তী সিদ্ধান্ত নোলোৱালৈকে অমৃতপাল সিং, বৰিন্দৰ সিং জোহাল আৰু পাপলপ্ৰীত সিঙকে ধৰি বাকী তিনিজন ৱাৰিছ পাঞ্জাৱ ডি সদস্য ডিব্ৰুগড় কাৰাগাৰত থাকিব।
উল্লেখযোগ্য যে, অমৃতপাল সিঙে ২০২৪ চনৰ সাধাৰণ নিৰ্বাচনত ডিব্ৰুগড় কাৰাগাৰত থাকোতেই খাদুৰ চাহিবৰ পৰা সাংসদ নিৰ্বাচিত হৈছিল।
