অসমত বনাঞ্চলৰ হ্ৰাস আৰু হোলোঙাপাৰ গিবন অভয়াৰণ্যত তেল আৰু প্ৰাকৃতিক গেছ অন্বেষণৰ অনুমতি প্ৰদানৰ বিষয়টো লৈ আজি লোকসভাত তীব্ৰ প্ৰতিক্ৰিয়া দেখা গৈছে। কংগ্ৰেছ দলৰ উপ-দলপতি গৌৰৱ গগৈয়ে অসমত বনাঞ্চলৰ যথেষ্ট হ্ৰাস হোৱাৰ অভিযোগ উত্থাপন কৰি উদ্বেগ প্ৰকাশ কৰিছে। তেওঁ হোলোঙাপাৰ গিবন অভয়াৰণ্যত তেল আৰু প্ৰাকৃতিক গেছ অন্বেষণৰ অনুমতি প্ৰদানৰ সন্দৰ্ভত ডাঙৰ তেল কোম্পানীৰ স্বাৰ্থ জড়িত থকাৰ প্ৰশ্ন উত্থাপন কৰিছে। গগৈয়ে বন ধ্বংসত জড়িত জিলা বন বিষয়াৰ ভূমিকাৰ ওপৰত তদন্ত হ’বনে বুলিও কঠোৰ প্ৰশ্ন উত্থাপন কৰিছে।
গগৈয়ে উল্লেখ কৰে যে, হোলোঙাপাৰ গিবন অভয়াৰণ্য এটা পৰিৱেশ সংবেদনশীল এলেকা, আৰু ইয়াত তেল আৰু গেছ অন্বেষণৰ অনুমতি কেনেকৈ দিয়া হ’ল সেই সন্দৰ্ভত স্পষ্টীকৰণ দাবী কৰিছে। তেওঁ কয় যে, কেন্দ্ৰীয় প্ৰদূষণ নিয়ন্ত্ৰণ বৰ্ডে (CPCB) এই এলেকাক ৰেড এলেকা তথা পৰিৱেশ সংবেদনশীল হিচাপে চিহ্নিত কৰিছে, আৰু ইয়াত তেল আৰু গেছ অন্বেষণৰ অনুমতি নাথাকে। বন্যপ্ৰাণী অভয়াৰণ্যত এনে অন্বেষণৰ অনুমতি দিয়া নিষিদ্ধ। অথচ এই অভয়াৰণ্যত অনুমতি কেনেকৈ দিয়া হ’ল, সেই সন্দৰ্ভত তেওঁ স্পষ্টীকৰণ বিচাৰিছে। তেওঁ এই কাৰ্যক অসমৰ জৈৱ বৈচিত্ৰ্যৰ বাবে এক ভাবুকি বুলি অভিহিত কৰিছে।
কেন্দ্ৰীয় বন আৰু পৰিৱেশ ৰাজ্য মন্ত্ৰী কীৰ্তি বৰ্ধমান সিঙে গগৈৰ প্ৰশ্নৰ উত্তৰ দি কয় যে, চৰকাৰে বন সংৰক্ষণ নিয়মাৱলী-১৯৮০ অনুসৰি সকলো নীতি-নিৰ্দেশনা পালন কৰি কাম কৰিছে। তেওঁ কয় যে, উন্নয়নমূলক কাম-কাজৰ লগতে বন সংৰক্ষণৰ নিয়মাৱলীও মানি চলা হৈছে, আৰু পৰিৱেশ আৰু বন ধ্বংস ৰোধ কৰিবলৈ যি কৰাৰ দৰকাৰ, চৰকাৰে তাক কৰিব বুলি কয়।
গগৈয়ে কাৰ্বি আংলং আৰু ডিমা হাচাওত বনাঞ্চল ধ্বংস হোৱাৰ অভিযোগ উত্থাপন কৰি এই হ্ৰাসৰ কাৰণ জানিব বিচাৰিছে। তেওঁ উল্লেখ কৰে যে, বিগত দুই-তিনি বছৰত অসমত বনাঞ্চল বৃদ্ধিৰ পৰিৱৰ্তে হ্ৰাস হৈছে। আইএছএফআৰৰ প্ৰতিবেদনৰ উদ্ধৃতি দি তেওঁ কয় যে, ২০২১ৰ পৰা ২০২৩ চনৰ ভিতৰত অসমত ৮৬.৬৬ বৰ্গ কিলোমিটাৰ বনাঞ্চল হ্ৰাস পাইছে। কাৰ্বি আংলং আৰু ডিমা হাচাওত জংঘল কাটি অবৈধ কয়লা খনন কৰাৰ ফলত এই হ্ৰাস হৈছে বুলি তেওঁ লোকসভাত তথ্য উত্থাপন কৰিছে।
মন্ত্ৰী কীৰ্তি বৰ্ধমান সিঙে গগৈৰ দাবীৰ বিপৰীতে কয় যে, অসমত বনাঞ্চল বৃদ্ধি হৈছে। তেওঁ কয় যে, ৭৪৮.৬৫ বৰ্গ কিলোমিটাৰ বনাঞ্চল বৃদ্ধি পাইছে। অৱশ্যে, তেওঁ গৌৰৱ গগৈৰ তথ্য শুদ্ধ বুলি স্বীকাৰ কৰি ০.০৩৮ শতাংশ বনাঞ্চল হ্ৰাস হোৱাৰ কথা উল্লেখ কৰে। মন্ত্ৰীয়ে কয় যে, বনাঞ্চল হ্ৰাসৰ কাৰণ তদন্ত কৰা হ’ব।
গৌৰৱ গগৈয়ে অসমৰ ডিমা হাচাও আৰু কাৰ্বি আংলংত দ্ৰুত গতিত বনাঞ্চল হ্ৰাস হোৱাৰ গুৰুতৰ অভিযোগ উত্থাপন কৰিছে। তেওঁ কেন্দ্ৰীয় চৰকাৰৰ পৰা এই বিষয়ত স্পষ্ট উত্তৰ বিচাৰিছে। তেওঁ অবৈধ কয়লা খননৰ নামত ডিমা হাচাও আৰু কাৰ্বি আংলংৰ বনাঞ্চল ধ্বংস কৰা হৈছে বুলি অভিযোগ উত্থাপন কৰিছে। তেওঁ কেন্দ্ৰীয় চৰকাৰক এই এলেকা পৰিদৰ্শন কৰিবলৈ এটা প্ৰতিনিধি দল পঠিয়াবলৈ দাবী জনাইছে। লগতে, স্থানীয় বন বিষয়াৰ ভূমিকাৰ ওপৰত তদন্ত কৰিবলৈ চৰকাৰক দাবী জনাইছে।
গগৈয়ে হোলোঙাপাৰ গিবন অভয়াৰণ্যত তেল আৰু প্ৰাকৃতিক গেছ খননৰ অনুমতি প্ৰদানৰ সন্দৰ্ভত প্ৰশ্ন উত্থাপন কৰিছে। তেওঁ কয় যে, কেন্দ্ৰীয় পৰিৱেশ মন্ত্ৰণালয়ৰ অধীনস্থ বন উপদেষ্টা পৰিষদে বেদান্ত তেল আৰু গেছ কোম্পানীক গিবন অভয়াৰণ্যৰ ৪.৪৯ হেক্টৰ ভূমিত তেল খননৰ অনুমতি প্ৰদান কৰিছে। গগৈয়ে এই অনুমতিৰ সপক্ষে কেন্দ্ৰীয় চৰকাৰৰ পৰা স্পষ্ট উত্তৰ বিচাৰিছে। তেওঁ উল্লেখ কৰে যে, হোলোঙাপাৰ গিবন অভয়াৰণ্য এটা অৰ্থনৈতিকভাৱে সংবেদনশীল এলেকা, আৰু ইয়াত তেল আৰু গেছ খননৰ দৰে কাৰ্যকলাপ নিষিদ্ধ। ২০১৮ চনত অধিসূচনা জাৰি কৰি এই ধৰণৰ কাৰ্যকলাপ নিষিদ্ধ কৰা হৈছিল, কিন্তু ২০১৯ চনৰ চূড়ান্ত অধিসূচনাত এই নিষেধাজ্ঞা অন্তৰ্ধান হৈছিল। গগৈয়ে এই সন্দৰ্ভত স্পষ্টীকৰণ বিচাৰিছে।
