গুৱাহাটী মহানগৰীত চিটিবাছৰ অতপালি অব্যাহত থাকোঁতে আজি পুনৰ এক ভয়ংকৰ পথ দুৰ্ঘটনাত এজন যুৱকৰ মৃত্যু হৈছে। নুনমাটিত সংঘটিত এই দুৰ্ঘটনাত এজন স্কুটী চালক থিতাতে নিহত হোৱা দেখা গৈছে। নিহত যুৱকজনৰ নাম অৰুণাচলৰ টিকিচি নবাব বুলি জনা গৈছে।
জানিব পৰা মতে, আজি দুপৰীয়া নাৰেংগী দিশৰ পৰা আহি থকা এএছ-০১-কেচি-৭৯৫১ নম্বৰৰ যাত্ৰী ভৰ্তি চিটিবাছখনে বিপৰীত দিশৰ পৰা আহি থকা এআৰ-০১-আৰ-০৮২৫ নম্বৰৰ স্কুটীখনক খুন্দা মাৰে। খুন্দা খাই স্কুটীখন বহু দূৰলৈ চোচোৰাই নিয়াত বাছখনৰ চকাৰ তলত সোমাই চূৰ্ণ-বিচূৰ্ণ হৈ পৰে। ফলত স্কুটী চালকজন থিতাতে নিহত হয়।
ঘটনাস্থলীত উপস্থিত হৈ নুনমাটি আৰক্ষীয়ে লোেকজনক উদ্ধাৰ কৰি গুৱাহাটী চিকিৎসা মহাবিদ্যালয়লৈ মৃতদেহ প্ৰেৰণ কৰে। নিহত যুৱকজন অৰুণাচলৰ টিকিচি নবাবে গুৱাহাটীত থাকি কাম কৰিছিল বুলি জনা গৈছে।
এই ঘটনাই মহানগৰীত চাঞ্চল্যৰ সৃষ্টি কৰিছে। একাংশ বাছ চালকে নিয়ম নমানি বাছ চলাই অহাৰ ফলত প্ৰায়ে এনে দুৰ্ঘটনা সংঘটিত হোৱাৰ অভিযোগ উত্থাপন হৈ আহিছে। কিন্তু গুৱাহাটী আৰক্ষীয়ে যেনেদৰে তৎপৰ হ’ব লাগিছিল তেনেদৰে তৎপৰ হোৱা দেখা নাযায় বুলি স্থানীয় লোকৰ মাজত অসন্তোষ প্ৰকাশ পাইছে।
