গুৱাহাটীৰ দীঘলীপুখুৰীৰ ওচৰত উৰণীয়া সেতু নিৰ্মাণৰ বিকল্প প্ৰস্তাৱ দাখিলৰ নিৰ্দেশ জাৰি কৰিছে গুৱাহাটী উচ্চ ন্যায়ালয়ে ৷ মঙলবাৰে গুৱাহাটী উচ্চ ন্যায়ালয়ে এখন নতুন উৰণীয়া সেতু নিৰ্মাণৰ বিকল্প প্ৰস্তাৱ দাখিল কৰিবলৈ অসম চৰকাৰৰ মুখ্য সচিবলৈ নিৰ্দেশ জাৰি কৰে।
গছ কটাৰ বিপক্ষে জনস্বাৰ্থ জড়িত এক আবেদনৰ শুনানি গ্ৰহণৰ সময়ত উচ্চ ন্যায়ালয়ৰ মুখ্য ন্যায়াধীশ বিজয় বিশ্নই আৰু ন্যায়াধীশ এন উন্নিকৃষ্ণণ নায়াৰৰে গঠিত এখন বিচাৰপীঠে এই নিৰ্দেশ জাৰি কৰে ৷ বিচাৰপীঠে লগতে আবেদনখনৰ শুনানিৰ পৰৱৰ্তী দিন ১৩ নৱেম্বৰ স্থিৰ কৰে। চৰকাৰৰ ফালৰ পৰা ১১ নৱেম্বৰৰ ভিতৰত শপথপত্ৰ দাখিলৰ নিৰ্দেশ প্ৰদান কৰা হয়।
গুৱাহাটীৰ স্থানীয় বাসিন্দাসকলৰ সংগঠন Concerned Citizens of Guwahati-এ পুৰণি গছসমূহ কটাৰ সিদ্ধান্তৰ বিৰুদ্ধে এই জনস্বাৰ্থ জড়িত আবেদন দাখিল কৰে। এই পুৰণি গছসমূহৰ ভিতৰত শতাব্দী প্ৰাচীন বহু গছো আছে।
এই জনস্বাৰ্থ বিষয়ক আবেদনত তৈয়বুল্লা ৰোড (৩৯০ মিটাৰ) আৰু পশ্চিম দীঘলীপুখুৰী ৰোড (২৫০ মিটাৰ) নামৰ দুটা নতুন পথৰ নির্মাণৰ প্ৰস্তাৱৰো বিৰোধিতা কৰা হৈছে ৷ এই প্ৰস্তাৱিত পথসমূহে গুৱাহাটী মহানগৰৰ জিএনবি ৰোডত নিৰ্মাণাধীন উৰণীয়া সেতুৰ স’তে সংযোগ স্থাপন কৰিব। আবেদনকাৰীসকলে উল্লেখ কৰিছে যে এই প্ৰকল্পৰ বাবে পুৰণি গছসমূহ কাটিবলগীয়া হ'ব। এই গছসমূহ চৌপাশৰ পৰিৱেশ আৰু ঐতিহ্যৰ বাবে এক গুৰুত্বপূৰ্ণ সম্পদ হিচাপে বিবেচিত।
আবেদনকাৰীসকলে এই ঐতিহাসিক গছসমূহৰ সংৰক্ষণৰ বাবে আহ্বান জনাইছে, কিয়নো এই গছসমূহ পৰিৱেশগত স্বাস্থ্য আৰু অঞ্চলটোৰ ঐতিহ্যক সুৰক্ষিত কৰি ৰাখিবলৈ গুৰুত্বপূৰ্ণ অৱদান আগবঢ়াইছে।
আবেদনখনৰ শুনানীৰ সময়ত চৰকাৰৰ হৈ অসমৰ মহাধিবক্তা দেৱজিৎ শইকীয়াই ন্যায়ালয়ক অৱগত কৰি কয় যে চৰকাৰে বিকল্পৰ সম্ভাৱনা বিবেচনা কৰি আছে। মুখ্যমন্ত্ৰী আৰু মুখ্যমন্ত্ৰীৰ কাৰ্যালয়ে সামাজিক মাধ্যমৰ জৰিয়তে জাননী দিয়ে যে জিএনবি উৰণীয়া সেতুৰ বাবে নতুন বিকল্প পথৰ সন্ধান চলাই থকা হৈছে যাতে পূব আৰু পশ্চিম দীঘলীপুখুৰী পথৰ ঐতিহাসিক গছসমূহ সংৰক্ষণ কৰিব পৰা যায়। ন্যায়ালয়ে বিষয়টো সন্দৰ্ভত সংশ্লিষ্ট পক্ষলৈ জাননী জাৰি কৰে আৰু অহা ১৩ নৱেম্বৰক আগন্তুক শুনানীৰ বাবে সময় নিৰ্ধাৰণ কৰে।
