“অসমৰ থলগিৰি জনগণৰ বুৰঞ্জীক বিকৃত নকৰিবলৈ বজৰং দলক শেষবাৰৰ বাবে সকীয়নি প্ৰদান কৰিছে সংযুক্ত মুক্তি বাহিনী স্বাধীনে,” বিদ্ৰোহী সংগঠনটোৱে ঘোষণা কৰে। সংযুক্ত মুক্তি বাহিনী স্বাধীনৰ সহঃ প্ৰচাৰ সম্পাদক ঈশান অসমে এক বিবৃতিত কৈছে, “প্ৰয়োজনত বিপৰীতে উপায়েৰে প্ৰতিক্ৰিয়া দিয়াৰ ব্যৱস্থা ল'বলৈ কুণ্ঠাবোধ নকৰোঁ।”
ঈশান অসমে ব্যক্ত কৰে যে মহাবীৰ লাচিত বৰফুকনৰ নামত বজৰং দলে অনুষ্ঠিত কৰিব খোজা ত্ৰিশূল দীক্ষা কাৰ্যসূচী “অসমৰ থলগিৰি জাতি-জনগোষ্ঠীৰ শৌৰ্য-বীৰ্য আৰু সাহসৰ প্ৰতীক”ক অপমান কৰে। তেওঁ লগতে কয়, “থলগিৰি জাতি সত্ত্বাৰ আবেগৰ নাম লাচিত বৰফুকন; এই মহান জাতীয় বীৰে দিল্লীৰ আক্ৰমণকাৰীক পৰাস্ত কৰি স্বদেশৰ সাৰ্বভৌমত্ব অক্ষুণ্ণ ৰাখিছিল।”
সংগঠনটোৱে সাবধানবাণী দিয়ে, “এয়া থলগিৰি জাতি-জনগোষ্ঠীৰ বাবে অপমানৰ বিষয়। যিটো কোনো কাৰণতেই সহ্য কৰিব নোৱাৰে।” সংগঠনটোৱে স্পষ্টভাবে উল্লেখ কৰে যে, “অসমৰ বুৰঞ্জীৰ ঊৰ্দ্ধত কোনো ৰাজনৈতিক বা অৰাজনৈতিক দল-সংগঠন হ'ব নোৱাৰে।”
“আলফা স্বাধীনে পৰৱৰ্তী সময়ত বিবৃতিৰ পৰিৱৰ্তে অন্য উপায়েৰে তাৰ প্ৰতিক্ৰিয়া দিয়াৰ ব্যৱস্থা কৰিব,” বিদ্ৰোহী সংগঠনটোৱে সকীয়নি দিয়ে।
আনহাতে, শিৱসাগৰত বোমাভৰ্তি মোনা উদ্ধাৰ সন্দৰ্ভত আলফা স্বাধীনে উদ্বেগ প্ৰকাশ কৰি কয়, “সংযুক্ত মুক্তি বাহিনী স্বাধীনৰ কোনো সদস্যই চহৰত বোমা সংস্থাপন কৰা নাই।” তেওঁলোকৰ মতে, “এয়া ঔপনিৱেশিক ৰাষ্ট্ৰযন্ত্ৰৰ পুৰণি নাটক পুনঃ মঞ্চস্থ কৰাৰ চেষ্টা,” যাতে থলগিৰি জনগণৰ আলফা স্বাধীনৰ প্ৰতি হেয়ভাৱ উদয় হয়।
