গুৱাহটী, মাৰ্চ ৫: ৰাজ্যখনৰ ২৪ হাজাৰ চৰকাৰী স্বাস্থ্যকৰ্মীয়ে দ্বিতীয় দিনটোও ধৰ্ণা-আন্দোলন অব্যাহত ৰাখিছে। এই আন্দোলনৰ ফলত ৰাজ্যৰ স্বাস্থ্য সেৱাত ব্যাপক প্ৰভাৱ পৰিছে। মুখ্যমন্ত্ৰী ড০ হিমন্ত বিশ্ব শৰ্মাই অসমত এতিয়া ধৰ্ণা-আন্দোলন নহয় বুলি দাবী কৰাৰ প্ৰত্যুত্তৰত স্বাস্থ্যকৰ্মীসকলে তেওঁলোকৰ প্ৰতিবাদ জাৰী ৰাখিছে। স্বাস্থ্যকৰ্মীসকলে তেওঁলোকৰ দাবীসমূহৰ প্ৰতি চৰকাৰৰ উদাসীনতাৰ বিৰুদ্ধে তীব্ৰ ক্ষোভ প্ৰকাশ কৰিছে। তেওঁলোকে দৰমহা বৃদ্ধি, চাকৰি নিয়মীয়াকৰণ, পেন্সন ব্যৱস্থা কৰা, মৃত কৰ্মচাৰীৰ পৰিয়ালক ২৫ লাখ টকাৰ আৰ্থিক সাহায্য, ভ্ৰমণ ভাত্তা, দৈনিক ভাত্তা, বিনামূলীয়া চিকিৎসা সেৱা আৰু ৰাজ্য চৰকাৰৰ অন্যান্য কৰ্মচাৰীৰ সৈতে সমান সুবিধা প্ৰদানৰ দাবী জনাইছে।
আন্দোলনৰ ফলত ৰাজ্যৰ স্বাস্থ্য সেৱা ব্যৱস্থা অচল হৈ পৰিছে। ৰাষ্ট্ৰীয় স্বাস্থ্য অভিযানৰ অন্তৰ্গত চিকিৎসক, নাৰ্চ, ফাৰ্মাচিষ্ট, লেবৰেটৰী টেকনিছিয়ান, কমিউনিটি হেলথ অফিচাৰ আদি সকলোৱে কৰ্মবিৰতি পালন কৰিছে। ইয়াৰ ফলত ৰাজ্যৰ চিকিৎসা মহাবিদ্যালয়, জিলা চিকিৎসালয়, মহকুমা চিকিৎসালয়, প্ৰাথমিক স্বাস্থ্য কেন্দ্ৰ আদিত সেৱা স্থবিৰ হৈ পৰিছে। ৰোগী আৰু অভিভাৱকসকলৰ মাজত হাহাকাৰৰ সৃষ্টি হৈছে।
চৰকাৰে এতিয়ালৈকে এই আন্দোলনৰ প্ৰতি গুৰুত্বসহকাৰে প্ৰতিক্ৰিয়া প্ৰকাশ কৰা নাই। চৰকাৰৰ কোনো প্ৰতিনিধিয়ে আন্দোলনকাৰীসকলৰ সৈতে আলোচনাত বহা নাই। ইয়াৰ ফলত স্বাস্থ্যকৰ্মীসকলৰ ক্ষোভ আৰু তীব্ৰ হৈছে। তেওঁলোকে চৰকাৰক সতৰ্ক কৰি দিছে যে যদি তেওঁলোকৰ দাবীসমূহ পূৰণ নহয়, তেন্তে আন্দোলন আৰু জোৰদাৰ হ’ব। সদৌ অসম স্বাস্থ্য-কাৰিকৰী কল্যাণ সন্থাই ৬ মাৰ্চলৈকে আন্দোলন অব্যাহত ৰাখিব বুলি ঘোষণা কৰিছে। তেওঁলোকে ৰাজপথত গণতান্ত্ৰিক সংগ্ৰাম অব্যাহত ৰাখিব বুলি কৈছে। স্বাস্থ্যকৰ্মীসকলে চৰকাৰক তেওঁলোকৰ দাবীসমূহৰ প্ৰতি গুৰুত্ব দিবলৈ আহ্বান জনাইছে।
Photo by UB Photos.
