আপৰ অসমৰ ৰাজ্যিক ভাৰপ্ৰাপ্ত সভাপতি ডা০ ভবেন চৌধুৰীয়ে আজি সংবাদমেলত ড০ হীৰেন গোঁহাইৰ নেতৃত্বত বিৰোধী শক্তি এক হোৱাৰ আহ্বানৰ প্ৰতি সম্পূৰ্ণ সমৰ্থন জনাইছে। তেওঁ বিজেপি চৰকাৰক সাম্প্ৰদায়িক আৰু মূল্যবৃদ্ধি নিয়ন্ত্ৰণত ব্যৰ্থ বুলি অভিহিত কৰিছে। তত্বাৱধায়ক ৰাজেশ শৰ্মাই দিল্লী নিৰ্বাচনৰ প্ৰত্যুত্তৰ অসমত দিব বুলি ঘোষণা কৰিছে।
ডা০ চৌধুৰীয়ে কয় যে বিজেপিৰ দৰে সাম্প্ৰদায়িক ৰাজনৈতিক দল এটাক কোনো দলেই অকলে প্ৰতিহত কৰিব নোৱাৰে। যদিও আপে এক সবল যুঁজ আগবঢ়াব পাৰিব, কিন্তু বিজেপিক সম্পূৰ্ণৰূপে প্ৰতিহত কৰিবলৈ সকলোৰে সহায় প্ৰয়োজন হ’ব। তেওঁলোকে পঞ্চায়ত নিৰ্বাচন আৰু ২০২৬ চনৰ বিধানসভা নিৰ্বাচনৰ বাবে সাজু হৈ থকাৰ কথা উল্লেখ কৰিছে।
মনোজ ধানোৱাৰ নিষ্ক্ৰিয় হৈ পৰাত ১ ফেব্ৰুৱাৰীত ডা০ ভবেন চৌধুৰীক ভাৰপ্ৰাপ্ত ৰাজ্যিক সভাপতি নিযুক্তি দিয়া হয়। দায়িত্ব গ্ৰহণ কৰিয়েই তেওঁ সংবাদমেলত ৰাজনৈতিক হিংসা, গণতান্ত্ৰিক প্ৰতিবাদত বাধা, সাংসদ আৰু বিধায়কৰ পত্নীৰ বিৰুদ্ধে অপপ্ৰচাৰ চলোৱাৰ অভিযোগ উত্থাপন কৰে। সাংসদ ৰকিবুল হুছেইনৰ ওপৰত হোৱা আক্রমণক গৰিহণা দি তেওঁ কয় যে এয়া ৰাজ্যৰ ৰাজনীতিৰ বাবে এক অশনি সংকেত।
চৌধুৰীয়ে কয় যে বিজেপিয়ে যিমানেই দমন নীতি অৱলম্বন নকৰক কিয়, ইয়াৰ প্ৰত্যুত্তৰ ৰাইজে ২০২৬ চনত নিশ্চয় দিব। অত্যধিক মূল্যবৃদ্ধি, সাম্প্ৰদায়িক মন্তব্য, পৰিবেশ ধ্বংস, বানপানী আদি সমস্যা সমাধানত ব্যৰ্থ চৰকাৰখনৰ বিৰুদ্ধে সাধাৰণ ৰাইজৰ ক্ষোভ দিনক দিনে বাঢ়ি আহিছে। তেওঁ অভিযোগ কৰে যে চৰকাৰখনে ২০২৬ বিধানসভা নিৰ্বাচনক লক্ষ্য কৰি এক বিশৃংখল পৰিস্থিতিৰ সৃষ্টি কৰিছে, যাতে ৰাইজে আতংক আৰু সংশয়ৰ বাবে ৰাজপথলৈ ওলাই নাহে।
এপিএছচিৰ কেলেংকাৰীৰ তদন্তৰ বাবে গঠিত বিপ্লৱ শৰ্মাৰ আয়োগৰ প্ৰতিবেদনক ৰাজনৈতিক উদ্দেশ্যপ্ৰণোদিত বুলি অভিহিত কৰি চৌধুৰীয়ে কয় যে অভিযুক্তৰ ভাষ্যহে গুৰুত্ব পাইছে, আৰক্ষী বিষয়াৰ ভাষ্য গ্ৰহণ কৰা হোৱা নাই। তেওঁ উমৰাংছুৰ কয়লাখনিৰ অবৈধ খনন আৰু শাসকীয় এচামৰ আয়তকৈ অধিক সা-সম্পত্তিৰ তদন্ত নোহোৱাকৈয়ে ৰখা হৈছে বুলি অভিযোগ উত্থাপন কৰে।
শেষত তেওঁ কয় যে বিজেপি চৰকাৰে মুখ্যমন্ত্ৰী হিমন্ত বিশ্ব শৰ্মাৰ নেতৃত্বত ৰাজ্যৰ ৰাজনীতি অতি নিম্ন স্তৰলৈ আৰু ব্যক্তিগত শত্রুতা পূৰণৰ স্তৰলৈ নমাই আনিছে, যিটো ৰাজ্যৰ ভৱিষ্যতৰ বাবে অশুভজনক।
