বিজেপিয়ে প্ৰথমবাৰৰ বাবে অসমত চৰকাৰ গঠন কৰাৰ পিছত ৰাজ্যৰ ৰাজধানী গুৱাহাটীত টুইন টাৱাৰ নিৰ্মাণৰ প্ৰতিশ্ৰুতি দিছিল। ২০১৮ চনত এই ঘোষণাৰ পিছত ৰাজ্যত ব্যাপক চৰ্চা হৈছিল। গুৱাহাটীৰ বেতকুছি এলেকাত এখন বেনাৰ লগাই টুইন টাৱাৰৰ আৰ্হি প্ৰদৰ্শন কৰা হৈছিল। কিন্তু আজিলৈকে টুইন টাৱাৰ নিৰ্মাণৰ আধাৰশিলাও স্থাপন হোৱা নাই। এই প্ৰকল্পটো লৈ বিৰোধী দলে বাৰে বাৰে বিজেপি চৰকাৰক সমালোচনা কৰি আহিছে।
বিৰোধী দলে প্ৰশ্ন কৰিছে যে, সৰ্বানন্দ সোণোৱালৰ মুখ্যমন্ত্ৰীত্বকালত ঘোষণা কৰা টুইন টাৱাৰ কেতিয়া নিৰ্মাণ হ’ব। বিজেপিয়ে এই প্ৰশ্নৰ সন্মুখীন হৈ বাৰে বাৰে আতৰি ফুৰা যেন লাগিছে। কিন্তু শেহতীয়াকৈ ২৫ আৰু ২৬ ফেব্ৰুৱাৰীত অনুষ্ঠিত হোৱা 'এডভাণ্টেজ অসম ২.০'ত দেশৰ কেইবাগৰাকী উদ্যোগপতিয়ে অসমত বিনিয়োগৰ ঘোষণা কৰাৰ পিছত পুনৰ টুইন টাৱাৰৰ প্ৰসংগ চৰ্চালৈ আহিছে।
গুৱাহাটীত কেতিয়া টুইন টাৱাৰ নিৰ্মাণ হ’ব সেই সম্পৰ্কে সাংবাদিকসকলৰ প্ৰশ্নৰ উত্তৰত মুখ্যমন্ত্ৰী হিমন্ত বিশ্ব শৰ্মাই স্পষ্টকৈ কৈছে যে, অসমত টুইন টাৱাৰ নিৰ্মাণৰ কাম আগবাঢ়ি আছে আৰু ইয়াৰ ৬০ শতাংশ কাম সম্পূৰ্ণ হৈছে। মুখ্যমন্ত্ৰীয়ে কৈছে যে, ৮০০ কোটি টকাৰ ব্যয়ত টুইন টাৱাৰ নিৰ্মাণ কৰা হৈছে। তেওঁ আৰু কৈছে যে, ইণ্টেগ্ৰেটেড ডিৰেক্টৰেট কমপ্লেক্সটোৱেই হৈছে টুইন টাৱাৰ। এই সংহত সচিবালয় চৌহদ টুইন টাৱাৰৰ আৰ্হিতেই নিৰ্মাণ কৰা হৈছে।
২০১৯ চনত বিধানসভাত কংগ্ৰেছৰ বিধায়ক জাকিৰ হুছেইন চিকদাৰে উদ্যোগ-বাণিজ্য বিভাগক টুইন টাৱাৰৰ বিষয়ে এটা প্ৰশ্ন কৰিছিল। তেতিয়াৰ উদ্যোগ-বাণিজ্য মন্ত্ৰী চন্দ্ৰমোহন পাটোৱাৰীয়ে উত্তৰ দিছিল যে, টুইন টাৱাৰ নিৰ্মাণৰ বাবে ২,১৪৯ কোটি টকা ব্যয় হ’ব আৰু ইয়াক ছেলফ ফাইনেন্সিয়েল মডেলত ৰাষ্ট্ৰীয় ভৱন নিৰ্মাণ নিগমৰ যোগেৰে কৰা হ’ব। অসম চৰকাৰে প্ৰকল্পটোৰ বাবে মাত্ৰ মাটিহে যোগান ধৰিব। চৰকাৰে ইতিমধ্যে ৩২ বিঘা মাটি হস্তান্তৰ কৰিছে।
কংগ্ৰেছে বিজেপি চৰকাৰক প্ৰশ্ন কৰি কৈছিল যে, টুইন টাৱাৰ নিৰ্মাণৰ ঘোষণাৰে বিজেপিয়ে চমক দিলেও কাম-কাজ আগবাঢ়া নাই। চৰকাৰে হস্তান্তৰ কৰা মাটিত 'ছাইট ফৰ টুইন টাৱাৰ' বুলি এখন ছাইনব’ৰ্ড লগোৱা হৈছিল, কিন্তু আজিলৈকে আধাৰশিলাও স্থাপন কৰা হোৱা নাই।
২০১৮ চনৰ ২৮ জানুৱাৰীত অনুষ্ঠিত হোৱা প্ৰথম 'এডভাণ্টেজ অসম'ত দেশৰ কেইবাগৰাকী উদ্যোগপতি অংশগ্ৰহণ কৰিছিল। তেতিয়া সোণোৱাল চৰকাৰে গুৱাহাটীত ৬৫ মহলীয়া টুইন টাৱাৰ নিৰ্মাণৰ ঘোষণা কৰিছিল। সেই বছৰৰ ২ ফেব্ৰুৱাৰীত ৰাজ্য চৰকাৰ আৰু ৰাষ্ট্ৰীয় ভৱন নিৰ্মাণ নিগমৰ মাজত বুজাবুজিৰ চুক্তি স্বাক্ষৰ হৈছিল। চৰকাৰে পাঁচ বছৰৰ ভিতৰত নিৰ্মাণ কাম সম্পূৰ্ণ কৰাৰ কথা কৈছিল। কিন্তু আজি সাত বছৰ পাৰ হৈছে, আৰু নিৰ্মাণস্থলী হাবি-জংঘলেৰে আগুৰি ধৰিছে।
বিৰোধী নেতা অখিল গগৈয়ে হিমন্ত বিশ্ব শৰ্মাক সমালোচনা কৰি কৈছে যে, মুখ্যমন্ত্ৰীয়ে মিছা কথা কয় আৰু টুইন টাৱাৰৰ বিষয়ে ভুল তথ্য দিয়ে। তেওঁ কৈছে যে, হিমন্ত বিশ্ব শৰ্মাই টুইন টাৱাৰৰ দৰে চেক্ৰেটেৰিয়েট বনাই থকা বুলি কৈছে, কিন্তু ইয়াৰ পিছত তেওঁলোকে টুইন টাৱাৰ চাবলৈ যাব বুলি কৈছে। অখিল গগৈয়ে কৈছে যে, হিমন্ত বিশ্ব শৰ্মাৰ দৰে মিছলীয়া মানুহ অসমত জন্ম হোৱা নাছিল আৰু তেওঁৰ মিছা কথাৰ বাবে তেওঁক সমালোচনা কৰিবলগীয়া হৈছে।
মুখ্যমন্ত্ৰীয়ে সাংবাদিকসকলক কৈছে যে, টুইন টাৱাৰ নিৰ্মাণৰ কাম আগবাঢ়ি আছে আৰু তেওঁলোকে ইয়াক চাবলৈ গৈ নাই। তেওঁ কৈছে যে, বিধানসভাত কোনেও এই বিষয়ে প্ৰশ্ন কৰা নাই আৰু সকলোৱে ধৰি লৈছে যে টুইন টাৱাৰ অসমত নহ’বই। মুখ্যমন্ত্ৰীয়ে কৈছে যে, তেওঁলোকে টুইন টাৱাৰৰ দৰে সংহত সচিবালয় চৌহদ নিৰ্মাণ কৰি আছে আৰু ইয়াকেই টুইন টাৱাৰ বুলি কোৱা হৈছে।
এই প্ৰসংগত বিৰোধী দলে কৈছে যে, বিজেপি চৰকাৰে প্ৰচাৰৰ বাবে টুইন টাৱাৰৰ কথা কৈছে, কিন্তু প্ৰকৃততে ইয়াৰ কাম-কাজ আগবাঢ়া নাই। তেওঁলোকে মুখ্যমন্ত্ৰীক এই বিষয়ে স্পষ্টকৈ উত্তৰ দিবলৈ দাবী কৰিছে।
